Almatyda mektep bitirýshiler jol erejesin jıi buzyp jatyr

ASTANA. KAZINFORM –  Kazinform agenttiginiń tilshisi habarlaǵandaı, Almaty qalasy polıtsııasy mektep bitirýshiler men olardyń ata-analaryn oqý jylynyń aıaqtalýyna arnalǵan sharalar kezinde qaýipsizdik erejeleri men tártipti saqtaýǵa shaqyrdy.

Almaty qalalyq polıtsııa departamenti jergilikti polıtsııa qyzmeti basqarmasynyń bastyǵy Serik Shumaevtyń aıtýynsha, sońǵy qońyraý – qýanyshty kún, alaıda ony qaıǵyly jaǵdaılarmen aıaqtamaý kerek.

— Ókinishke qaraı, bitirýshiler tarapynan jol júrý erejelerin óreskel buzýdyń 20 jaǵdaıy tirkeldi. Jasóspirimder kólik terezelerinen jáne lıýkterinen shyǵyp, qaýipti manevrler jasaǵan. Mundaı kólikter toqtatylyp, júrgizýshiler jaýapkershilikke tartyldy.

Sonymen qatar ata-analar da óz mindetterin durys oryndamaǵany úshin jaýapqa tartyldy. Barsha azamattardy jol erejesin saqtaýǵa, al ata-analardy balalarynyń qaıda júrgenin, úılerine qalaı oralatynyn baqylaýǵa shaqyramyz. Qaýipsizdik – bárinen mańyzdy, — dedi ol.

Aıta keteıik, Qyzylorda polıtsııasy sońǵy qońyraý kúni jumysty kúsheıtti.