Almatyda medıtsınalyq mekeme tirkelý tártibi qandaı
ALMATY. KAZINFORM – Almaty turǵyndary men qalaǵa kóship kelgen azamattar medıtsınalyq mekemege qalaı tirkele alady? Bul týraly №28 qalalyq emhananyń patsıentterdi qoldaý jáne ishki aýdıt qyzmetiniń úılestirýshisi Ajarhaným Navrýzova túsindirip berdi.
Azamattar bir aýdannan ekinshisine kóshkende ne ózge óńirden megapolıske qonys aýdarǵanda qujattardy qaıta resimdeý qajettiligimen betpe-bet keledi. Ajarhaným Navrýzovanyń aıtýynsha, mundaı jaǵdaıdaǵy alǵashqy medıtsınalyq-sanıtarııalyq kómek uıymdaryna tirkeý protsesi QR zańnamasynda naqty belgilengen. Basty normatıvtik qujat - QR Densaýlyq saqtaý mınıstriniń 2020 jylǵy 13 qarashadaǵy №QR DSM-194/2020 buıryǵy. Bul erejeler ótinish berý tártibin anyqtaıdy jáne balalar men sheteldik azamattardy qosa alǵanda, halyqtyń ártúrli sanattaryna qyzmet kórsetý erekshelikterin eskeredi.
Maman Qazaqstannyń azamattarynyń kópshiligi úshin tirkeý rásimi olardyń turaqty nemese ýaqytsha tirkelgen mekenjaıyna, sondaı-aq medıtsınalyq mekemeniń ózi ornalasqan aýmaqqa qoljetimdiligine tikeleı baılanysty ekenin atap ótti. Turǵylyqty mekenjaıyn esepke almaı, kez kelgen emhanany tańdaý úshin tek qazaqstandyq azamattyqtyń bolýy jetkiliksiz. Mysaly, Almatyda páter jaldap júrgen basqa óńirdiń azamattary eń aldymen ýaqytsha tirkeý máselesin sheshýi qajet.
Mekemeni mekenjaıǵa baılanystyrý emhanalarǵa dárigerlik ýchaskelerge túsetin júktemeni durys josparlaý, profılaktıkalyq tekserýlerdi uıymdastyrý jáne patsıentterdi baqylaý úshin qajet. Bul rette jańa medıtsınalyq mekemege onlaın tirkelýge bolady: ótinish maquldanǵan jaǵdaıda azamat aldyńǵy emhanadan avtomatty túrde shyǵarylady.
Zańnamada halyqtyń keıbir sanattary úshin jeńildikter qarastyrylǵan. Máselen, kámeletke tolmaǵan balalar, júkti áıelder jáne bosanǵan jas analar resmı tirkeýi bolmasa da, naqty turǵylyqty mekenjaıy boıynsha tirkelýge quqyly. Bul rette bala qabyldanatyn medıtsınalyq mekemege basymdyq beriledi — ata-analar da yńǵaıly bolý úshin osy emhana men ýchaskege tirkele alady.
Múgedektigi bar adamdar úshin erekshe tártip qarastyrylǵan: II jáne III toptaǵy azamattar eGov portaly arqyly qashyqtan ótinish jibere alady, al I top úshin jeke ótinish berý quqyǵy saqtalady. Joǵary oqý oryndary men kolledjderdiń stýdentteri oqý nemese jataqhana ornyn eskere otyryp, emhana tańdaı alady.
Sheteldik azamattarǵa medıtsınalyq kómek kórsetý sharttary olardyń mártebesine tikeleı baılanysty. Qazaqstanda turýǵa yqtııarhaty bar sheteldikter jalpy negizde tirkeledi. Elde ýaqytsha bolatyn sheteldik azamattarǵa medıtsına úshin yqtııarhat alýdyń qajeti joq, biraq olarǵa mindetti túrde erikti medıtsınalyq saqtandyrýdyń qoldanystaǵy sharty qajet bolady.
Keıde eGov portalyndaǵy elektrondyq ótinishter qabyldanbaı qalady. Maman oǵan ótinishti toltyrý kezindegi qatelikter, kórsetilgen málimetterdiń sáıkes kelmeýi nemese aýmaqtyq qoljetimdilik sharttarynyń buzylýy sebep bolýy múmkin ekenin aıtty. Mundaı jaǵdaıda aldymen, jeke kabınette ótinishten bas tartýdyń naqty sebebin anyqtaý qajet.
- Sondaı-aq josparly ambýlatorııalyq qyzmet kórsetý men shuǵyl kómekti ajyrata bilý mańyzdy. Naqty emhanaǵa tirkelýdiń bolmaýy adamdy kenetten paıda bolǵan qaýipti jaǵdaılarda shuǵyl medıtsınalyq kómek alý quqyǵynan aıyrmaıdy. Eń bastysy — óz quqyqtaryńyzdy bilý, tirkeý tártibin túsiný jáne uıymdastyrýshylyq máselelerdi ýaqtyly sheshý. Eger qıyndyqtar týyndasa, asyǵys qorytyndy jasaýdyń qajeti joq: aldymen sebebin anyqtap, túsinikteme alý kerek, - dedi Ajarhaným Navrýzova.
Eske salaıyq, buǵan deıin Almatyda MÁMS qarajatynan 130 mlrd teńge qaıda jumsalatynyn jazǵanbyz.
