Almatyda Medeýden Shymbulaqqa deıingi joldyń keı bóliginde qozǵalys shekteledi
ALMATY. KAZINFORM — Almatyda Medeýden Shymbulaq taý shańǵysy kýrortyna deıingi aralyqta ınjenerlik ınfraqurylym qurylysy jalǵasyp jatyr.
Joba aıasynda uzyndyǵy 5,7 shaqyrym bolatyn orta qysymdy gaz qubyry men 2,7 shaqyrym káriz jelisin salý kózdelgen. Bul joba atalǵan baǵyt boıynda ornalasqan nysandardy, sonyń ishinde Shymbulaq taý shańǵysy kýrortynyń aýmaǵyn ınjenerlik ınfraqurylymmen qamtamasyz etýge múmkindik beredi.
Qala ákimdiginiń málimetinshe, jobany Almaty energetıka jáne sýmen jabdyqtaý basqarmasynyń tapsyrysy boıynsha merdiger uıym júzege asyryp jatyr.
Qazirgi ýaqytta merdiger uıym qurylys-montaj jumystaryna kiristi. Gaz qubyrynyń alǵashqy ýchaskelerin ornatý, káriz jelilerin tartý jáne temirbeton qudyqtaryn ornatý jumystary júrgizilýde. Injenerlik jelilerdiń qurylysyn 2026 jyly qarasha aıynyń sońyna deıin aıaqtaý josparlanyp otyr.
— Onyń maqsaty — kommýnaldyq júıelerdiń senimdiligin arttyrý jáne týrıstik ınfraqurylymdy damytý. Barlyq jumys jobalyq qujattamaǵa, qurylys normalaryna jáne ekologııalyq talaptarǵa sáıkes júrgizilip jatyr. Ásirese, tabıǵı landshafty saqtaýǵa jáne qorshaǵan ortaǵa keletin áserdi barynsha azaıtýǵa erekshe kóńil bólingen, — delingen habarlamada.
Qurylys-montaj jumystary júrgiziletin kezeńde joldyń keı bóliginde qozǵalysqa ýaqytsha shekteý engizilip, arnaıy tehnıkalar jumys isteýi múmkin. Qala ákimdigi osyǵan baılanysty turǵyndary men qonaqtarynan saparlaryn josparlaý kezinde osy aqparatty eskerýin ótindi.
Eske salaıyq, buǵan deıin «Shymbulaq» shatqalyna kólikti kirgizýge shekteý qoıý konstıtýtsııalyq emes dep tanylǵanyn jazǵanbyz.
