Almatyda Medeý men Shymbulaqqa kólikpen kirý tártibi ózgerdi
ALMATY. KAZINFORM — Almatyda máslıhat sessııasynda «Medeý» óńirlik tabıǵı parki men «Shymbulaq» shatqalynyń erekshe qorǵalatyn tabıǵı aýmaqtaryna kólikpen kirýdi retteıtin jańa tártip usynyldy.
Almaty ekologııa jáne qorshaǵan orta basqarmasy basshysynyń orynbasary Arshat Bahtygereevtiń aıtýynsha, jańa tártiptiń negizgi maqsaty — erekshe qorǵalatyn aýmaqtarǵa túsetin kólik jáne antropogendik júktemeni azaıtý.
— Biz burynǵy tártipti jaı ǵana saqtap qalýdy emes, ekologııalyq jaǵdaıdy, zań talaptaryn jáne turǵyndardyń quqyǵyn eskere otyryp, kólik júktemesin retteýdiń zańdy tetigin engizýdi usynyp otyrmyz, — dedi Arshat Bahtygereev.
Basqarma málimetinshe, baqylaý-ótkizý pýnkti arqyly táýligine shamamen 700 kólik ótedi. 2026 jyldyń segiz aıynda 179 024 kólik ótken. Al 2022 jyly bul kórsetkish 76 606 bolǵan.
Jańa tártip boıynsha ishten janý qozǵaltqyshy bar kólikterdiń kirýine shekteý qoıylady.
Al elektromobılderge bólek rejım qarastyrylǵan. Ondaı kólikterge jumys kúnderi kirýge ruqsat etiledi.
Sonymen qatar demalys jáne mereke kúnderi shekteý barlyq kólikke qoldanylady.
Bul rette jańa tártip turǵyndardyń múddesin, sondaı-aq jedel, kommýnaldyq jáne arnaıy qyzmetterdiń jumysyn eskeredi. Atalǵan aýmaqta 48 jeke turǵyn úı, «Qazgıdromet» pen «Qazseldenqorǵaýǵa» tıesili qyzmettik-turǵyn úı ǵımarattary, sondaı-aq Tuıyqsý shatqalyndaǵy nysandar ornalasqan.
Eske salaıyq, «Shymbulaq» taý-shańǵy kýrortyna aparatyn Medeý — Tuıyqsý avtojolynda ınjenerlik ınfraqurylymdy jańǵyrtýǵa baǵyttalǵan josparly jumystar júrgiziletini habarlandy.
Sondaı-aq Shymbulaqtaǵy aspaly joldar ýaqytsha jabylatynyn jazǵanbyz.
