Almatyda maıdanda medbıke bolǵan 99 jastaǵy ardager turady
ALMATY. KAZINFORM – Almatyda 43 soǵys ardageri turady. Solardyń biri - Ekaterına Baranova. Bıyl 99 jasqa toldy. Keıýana áli tyń.
Jyl sanap qatary sırep bara jatqan soǵys ardagerleri - tili bar tiri tarıhtyń naǵyz ózi. Solardyń biri Almaty qalasynda turatyn 99 jastaǵy Ekaterına Baranova. Qan maıdandy kózben kórgen ol 1943 jyldyń mamyrynan 1945 jyldyń jeltoqsanyna deıin Ýkraına maıdanynda gospıtal medbıkesi boldy.
«Biz jaraly jaýyngerlerdi urys dalasynan zembilmen jertólege tasydyq. Alǵashqy kómekti kórsetip, maıdannan gospıtalge jetkizip, jaraqattaryna qaraı eshelondarǵa bóldik. Ol kezde dári- dármek joqtyń qasy edi. Aspırın men streptotsıdtten basqa eshteńe bolmaıtyn»,- dep eske aldy soǵys ardageri.
Medıtsına qyzmetiniń aǵa leıtenanty Ekaterına Baranova Jeńisti Chehoslovakııada qarsy aldy. Soǵystan keıin ardager 40 jyl taban aýdarmaı Almatydaǵy áskerı gospıtalda medbıke bolyp jumys istedi. Júzdegen adamnyń ómirin saqtap qalýǵa yqpal etti.
«Ótkensiz bolashaq joq. Men óz ómirimde júzdegen adamǵa kómektestim. Jap-jas kezimde soǵysta jaraly sarbazdardy názik ıyǵyma salyp tasydym. Maǵan adamdarǵa degen meıirim men mahabbat kúsh berdi», - deıdi ol.
Qazir jalǵyz ulynan eki nemere men úsh shóberesi bar. Jasy júzge taıap qalsada, áli tyń.
«El aman, jurt tynysh bolsyn. Óskeleń urpaq tek beıbit zamanda ómir súrse degen tilegim bar»,- dedi soǵys ardageri.