Almatyda «Matic Basket» qarjy pıramıdasy 2 myń adamnyń 80 mln teńgesin qoldy etken

ALMATY. KAZINFORM – Qarjy monıtorıngi agenttiginiń Almaty qalasy boıynsha departamenti «Matic Basket» qarjy pıramıdasynyń qyzmetin toqtatty.

Qarjy monıtorıngi agenttiginiń málimetinshe, uıymdastyrýshylar ózderin áleýmettik jelileri arqyly jarnamalap, azamattardy «Matic Basket» jobasyna aqsha salýǵa shaqyrǵan. Olar krıptovalıýta bırjasynda maınıng pen treıdıng arqyly joǵary paıda tabýdy ýáde etken. Zardap shekken adamdar 5 000 teńgeden 1 100 AQSh dollaryna deıin aqsha salǵan.

- Alaıda salymshylarǵa aqsha salǵanyn rastaıtyn eshqandaı qujat berilmegen, ári olarmen kelisimshart nemese resmı kelisimder jasalmaǵan. Jańa qatysýshyny tartqan jaǵdaıda árbir qarjylyq operatsııadan 10 paıyz kóleminde kiris túsetini aıtylǵan. Nátıjesinde qarjy pıramıdasyna Qazaqstan men TMD elderiniń 1900-den astam azamaty tartylyp, jalpy somasy 80 mln teńgeden astam qarajat salynǵan, - dep habarlady Qarjy monıtorıng agenttiginen.

Qazirgi ýaqytta kúdiktige qatysty bultartpaý sharasy retinde elden shyǵýǵa tyıym salyndy. Tergeý amaldary júrip jatyr.

Eske salaıyq, buǵan deıin Mańǵystaý oblysynda 80-nen astam adam qarjy pıramıdasynyń qurbany bolǵanyn jazǵanbyz.