Almatyda Mass Alert jer silkinisin eskertý júıesi synaqtan ótkiziledi

ALMATY. KAZINFORM – Memleket basshysynyń tapsyrmasymen Almatyda Mass Alert tóteshe jaǵdaı týraly jedel qulaqtandyrý júıesin iske qosý jobasy júzege asyrylady.

Birinshi kezeńde – 31 mamyrdan bastap júıe Android qurylǵylaryn paıdalanýshylar úshin iske qosylady.

Erteń, saǵat 12:00-de Android mobıldi qurylǵylardy paıdalanýshylarǵa qazaq, orys jáne aǵylshyn tilinde «Alańdamańyzdar. halyqty habardar etý júıesine tekserý júrgizilýde. Ne bespokoıtes. Provodıtsıa proverka sıstemy opoveşenııa naselenııa. Remain calm. The public alert system is being tested», - degen habarlama kelip túsedi. 

Ekinshi kezeńde iOS qurylǵysynyń paıdalanýshylary júıege qosylady.

Mass Alert júıesiniń SMS-ke qaraǵanda birqatar artyqshylyǵy bar. Habarlama mobıldi operator jelisine qosylǵan, sondaı-aq jeke tańdalǵan geografııalyq aımaqtaǵy barlyq abonentke keledi. Sonymen qatar, júıe jelilerdiń shamadan tys júktelý jaǵdaıynda jumys isteıdi. Cell Broadcast tehnologııasynyń basty artyqshylyǵy, qamtý aımaǵyndaǵy barlyq abonentti birden ári jappaı eskertedi. 

Sondaı-aq, Mass Alert-ti Almaty TJD jer silkinisi týraly erte qulaqtandyrýdyń avtomatty júıesimen biriktirý josparlanǵan.

Buǵan deıin Vıtse-premer Qanat Bozymbaev tótenshe jaǵdaı týyndaǵan sátte azamattardy ýaqtyly habardar etý maqsatynda Mass Alert júıesi 1 maýsymǵa deıin pılottyq rejımde engiziletinin aıtqan bolatyn.