Almatyda máslıhat saılaýyna 201 kandıdat tirkeldi
ALMATY. KAZINFORM — Elimizde máslıhattar depýtattarynyń kezekten tys saılaýy 2026 jylǵy 29 qarashada ótedi.
Almaty qalasy aýmaqtyq saılaý komıssııasynyń (ASK) málimetinshe, megapolıste saılaý naýqany negizgi is-sharalardyń bekitilgen kúntizbelik josparyna sáıkes júrgizilip jatyr. Buǵan deıin saılaý okrýgteriniń tizimi, olardyń shekaralary, aýmaqtyq, okrýgtik jáne ýchaskelik saılaý komıssııalarynyń ornalasqan jeri, sondaı-aq olardyń quramy týraly málimetter jarııalanǵan. Tıisti aqparatpen Almaty qalasy ákimdiginiń resmı ınternet-resýrsyndaǵy «Saılaý» bóliminde tanysýǵa bolady.
Búginde Almatyda birmandattyq aýmaqtyq saılaý okrýgteri boıynsha máslıhat depýtattyǵyna 82 kandıdat tirkelgen. Al 6 saıası partııa quramynda 119 kandıdat bar partııalyq tizimdi usynǵan.
— Olar 2026 jylǵy 1 qarashadaǵy jaǵdaı boıynsha zańnamada belgilengen tártippen tirkeýden ótti, — dep habarlady ASK baspasóz qyzmeti.
Odan bólek turǵyndardy aldaǵy saılaý týraly habardar etý maqsatynda qalada aqparattyq-túsindirý jumystary júrgizilip jatyr. ASK habarlaýynsha, qala aýmaǵynda aqparattyq bannerler ornalastyrylyp, LED-ekrandarda aldaǵy daýys berý týraly aqparat qamtylǵan taqyryptyq beınerolıkter kórsetilip keledi.
Almatyda saılaýaldy úgit-nasıhatqa qatysý úshin teń jaǵdaılardy qamtamasyz etý maqsatynda kandıdattar men saıası partııalar paıdalana alatyn oryndar men úı-jaılar da aıqyndalǵan:
- Kandıdattardyń saılaýshylarmen kezdesýlerin sharttyq negizde ótkizý úshin 141 úı-jaı qarastyrylǵan;
- Barlyq kandıdattardyń úgit-nasıhat baspa materıaldaryn ornalastyrý úshin 476 oryn belgilengen.
— Saılaýshylarmen kezdesýler ótkizýge arnalǵan úı-jaılar berý jáne úgit-nasıhat materıaldaryn ornalastyrý oryndaryn aıqyndaý saılaýaldy úgit-nasıhattyń qoljetimdiligin qamtamasyz etýge jáne qala turǵyndaryn kandıdattar týraly habardar etýge baǵyttalǵan, — dep málimdedi Almaty qalasy aýmaqtyq saılaý komıssııasynan.
Sonymnen qatar saılaýaldy úgit-nasıhat kandıdattar men partııalyq tizimdi tirkeý aıaqtalǵannan keıin, ıaǵnı 2026 jylǵy 1 qarashada saǵat 18:00–de bastalatyny atap ótildi. Úgit-nasıhat jumystary 2026 jylǵy 28 qarashada saǵat 00:00–de aıaqtalady.
Eske salaıyq, el boıynsha máslıhat saılaýynda 12 mıllıonnan astam qazaqstandyq daýys bere alady.
29 qarashada ótetin máslıhat saılaýyn uıymdastyrýǵa jáne ótkizýge 35,8 mlrd teńge qarastyrylady. Bul týraly OSK múshesi Mıhaıl Bortnık málimdedi.
