Almatyda mas kúıinde jol erejesin buzyp, qashyp ketken kúdikti Polshada ustaldy
ASTANA. KAZINFORM – Búgin Qazaqstan Respýblıkasy Bas prokýratýrasynyń jáne Іshki ister mınıstrliginiń Interpol qyzmetkerleri Qazaqstan Respýblıkasynyń Polsha Respýblıkasyndaǵy Elshiliginiń kómegimen alkogoldik masań kúıde jol qozǵalysy erejelerin buzǵany úshin qylmystyq jaýapkershilikke tartý maqsatynda Polshadan Grýzııa azamatyn ekstradıtsııalady.
Kúdikti 2023 jyly Almaty qalasynda alkogoldik masań kúıde kólik júrgizip kele jatyp, qarsy jolaqqa shyǵyp ketken, nátıjesinde basqa kólikpen soqtyǵysyp, júrgizýshiniń densaýlyǵyna aýyr zııan keltirdi.
«Qylmys jasaǵannan keıin kúdikti jasyrynyp, halyqaralyq izdeýge jarııalanǵan. Aǵymdaǵy jyldyń sáýir aıynda ol Polshada ustaldy.
Qazaqstan Respýblıkasy Bas prokýratýrasynyń suraýy boıynsha kúdikti Qazaqstanǵa ekstradıtsııalanyp, qazir tergeý ızolıatoryna qamaldy.
Aıyptalyp otyrǵan qylmysy úshin on jyl merzimge belgili bir laýazymdardy atqarý nemese belgili bir qyzmetpen aınalysý quqyǵynan aıyra otyryp, úsh jylǵa deıingi merzimge bas bostandyǵynan aıyrý túrindegi jaza kózdelgen», — dep jazdy baqylaýshy organnan.
Aıta ketý kerek, Polsha Respýblıkasymen ekstradıtsııalaý týraly kelisimniń joqtyǵyna qaramastan, kúdiktini ekstradıtsııalaý Qazaqstannyń Bas prokýratýrasy men Polsha Ádilet mınıstrliginiń arasyndaǵy tyǵyz yntymaqtastyqtyń arqasynda múmkin boldy.
Sonymen qatar aǵymdaǵy jyly Polsha tarapynan Qazaqstan aýmaǵynda asa iri kólemde esirtki bıznesimen aınalysqan transulttyq uıymdasqan toptyń uıymdastyrýshysy Qazaqstanǵa ekstradıtsııalandy.
