Almatyda MÁMS qarajatynan 130 mlrd teńge qaıda jumsaldy
ALMATY. KAZINFORM – 2026 jyly Medıtsınalyq saqtandyrý qory Almaty qalasyndaǵy medıtsına uıymdaryna turǵyndar alǵan medkómek úshin 130,3 mlrd teńge tóledi.
Áleýmettik medıtsınalyq saqtandyrý qory Almaty fılıalynyń málimetinshe, MÁMS paketinen alynǵan qarajattyń basym bóligi, ıaǵnı 74,2 mlrd teńgesi statsıonarlyq kómekke baǵyttalǵan. Odan bólek shamamen 5,8 mlrd teńgesi kúndizgi statsıonar qyzmetine, 22,2 mlrd teńge konsýltatıvtik-dıagnostıkalyq qyzmetterge, joǵary tehnologııalardyń kómegimen jasalatyn operatsııalarǵa 16,8 mlrd teńge, medıtsınalyq reabılıtatsııaǵa 5,1 mlrd teńge jumsalǵan.
- Quny birneshe mıllıon turatyn qymbat otalardy saqtandyrylǵan azamattar tólegen jarnasynyń mólsherine qaramaı jasata beredi. MÁMS júıesindegi ortaq jaýapkershiliktiń máni osynda, – dedi Áleýmettik medıtsınalyq saqtandyrý qorynyń Almaty qalalyq fılıalynyń dırektory Іlııas Muhamedjan.
Bıyl Almaty qalasynda jalpy alǵanda 19,9 mlrd teńgege 7367 kardıohırýrgııalyq operatsııa jasalǵan. Bir otanyń quny orta eseppen 3 mln teńgege shyǵady. Sonymen qatar 3167 neırohırýrgııalyq operatsııa jasalǵan. Oǵan Qor 5,6 mlrd teńge tólegen.
Tize jáne jambas býyndaryn almastyrý operatsııalaryna degen suranys ta joǵary. Almatyda 3368 býyn almastyrý otasy jasalypty. Operatsııalardyń jalpy quny - 5,3 mlrd teńge. Al neıro-qan tamyr jáne qan-tamyr júıesine jasaǵan 3558 otaǵa 4,6 mlrd teńge jumsalǵan.
Sonymen qatar megapolıste osy jyly 54 baýyr, búırek jáne júrek almastyryldy. Mundaı bir otanyń quny 10 mln teńgege deıin jetedi.
Eń qymbat otalar tizimin ımplanttalatyn qosalqy júrek júıesi (LVAD) bastap tur. Bul júrekke qandy aıdaýǵa kómektesetin mehanıkalyq qondyrǵy. Ol translantatsııany kútip júrgen nemese júregin almastyrýǵa bolmaıtyn naýqastarǵa qoldanylady. Bireýiniń quny – 80,2 mln teńge. 2025 jyly osyndaı 1 ota jasalsa, 2026 jyly bundaı 14 ota jasalǵan.
Odan keıin baǵasy boıynsha allogendi gemopoetıkalyq diń jasýshalaryn almastyrý otasy tur, quny – 17,5 mln teńge.
Úshtikti júrektiń mıtraldy qaqpaqshasyn almastyrý otasy túıindeıdi. Bir qyzmet quny – 17 mln teńge. 2025 jyly osyndaı 2 ota jasalsa, 2026 jyly olardyń sany 19-ǵa jetken.
Eske salaıyq, buǵan deıin Almatyda dárigerler kózine tas kirgen naýqastyń kórý qabiletin saqtap qaldy.
