Almatyda makýlatýra óńdeıtin kásiporyndardyń qýaty jylyna 200 myń tonnadan asady
ALMATY. KAZINFORM – Almatyda qaǵaz qaldyqtaryn qaıta óńdeıtin eki kásiporyndy jańǵyrtý jobasy júzege asyrylyp jatyr. Jumystar aıaqtalǵannan keıin olardyń jıyntyq óndiristik qýaty jylyna 200 myń tonnadan asady.
QR Ekologııa jáne tabıǵı resýrstar mınıstrliginiń málimetinshe, «Jasyl damý» AQ qoldanystaǵy kásiporyndardy jańǵyrtýǵa jáne qaldyqtardy qaıta óńdeý kólemin arttyrýǵa baǵyttalǵan jobalardy qarjylandyrýdy jalǵastyryp keledi.
Іri jobalardyń biri – «KZ Recycling» JShS kásipornyn jańǵyrtý. Joba júzege asqannan keıin munda qaǵaz qaldyqtaryn qaıta óńdeý qýaty jylyna 150 myń tonnaǵa deıin ulǵaıady. Jobanyń jalpy quny shamamen 36,5 mlrd teńgeni quraıdy.
– Joba «Jasyl damý» AQ tarapynan kádege jaratý tólemderi esebinen «Ónerkásipti damytý qory» AQ-men birlesip qarjylandyryldy. Qarajat tolyq kólemde ıgerildi. Qazirgi ýaqytta qurylys-montaj jumystary júrgizilip, qajetti ınfraqurylym daıyndalýda, – dep habarlady Ekologııa jáne tabıǵı resýrstar mınıstrligi.
Atalǵan jobany tolyq aıaqtaý 2028 jylǵa josparlanǵan.
Mınıstrlik dereginshe, Almatyda qaǵaz qaldyqtaryn qaıta óńdeý baǵytynda barlyǵy eki joba iske asyrylyp jatyr. Eki kásiporyndy jańǵyrtý aıaqtalǵan soń olardyń jıyntyq qýaty jylyna 200 myń tonnadan asady.
Bul jobalar qaldyqtardy qaıta óńdeý ınfraqurylymyn damytýǵa jáne makýlatýrany qaıta aınalymǵa jiberý kólemin arttyrýǵa baǵyttalǵan.
Aıta keteıik, Almaty oblysynyń agrokásiporyndary ónimin 10 elge eksporttap otyr.
