Almatyda magıstraldy kóshelerdi ortasha jóndeý jumystary aıaqtaldy

ALMATY. KAZINFORM – Almatyda uzaqtyǵy 40 km bolatyn 15 magıstraldy kósheniń ortasha qurylys jumystary aıaqtaldy.

Qalalyq mobıldilik basqarmasynyń málimetinshe, bıyl jóndeý jumystary Qabanbaı batyr, Qajymuqan, Jubanov, Ulyqbek, Maılın, Buqtyrma, Momyshuly, Bekmahanuly, Dýlatı, Serikbaev, Jarokov, Tóle bı, Bógenbaı batyr, Tilendıev kóshelerinde jáne Nazarbaev dańǵylynda júrgizildi.

Sonymen qatar aýdandyq mańyzy bar uzyndyǵy 117 shaqyrym bolatyn 123 kóshedegi jóndeý jumystary aıaqtaldy. Qazir uzyndyǵy 120 shaqyrymdy quraıtyn aýdandyq jáne jergilikti mańyzy bar 188 kóshede jumystar jurgizilip jatyr. Onyń 60 paıyzdan astamy qyrkúıekte tapsyrylmaq, qalǵany qazannyń 20-laryna deıin aıaqtalady.

— Osylaısha, bıyl ortasha jóndeýmen jalpy uzyndyǵy 277 shaqyrym bolatyn 326 kóshe qamtylady. Bul buǵan deıin jarııalanǵan jospardan 23 shaqyrymǵa az. Sebebi birneshe kóshe asfalt astyndaǵy ınjenerlik jelilerdi aýystyrý qajettigine baılanysty tizimnen alyndy, — dep atap ótti basqarmadan.

Budan bólek, basqarma jelisi boıynsha qalada magıstraldyq jáne radıaldy kóshelerdi salý, sondaı-aq Alǵabas, Shuǵyla, Aqjar, Boraldaı, Jas-Qanat jáne Rahat-Mádenıet shaǵyn aýdandarynda jol qurylysy júrgizilip jatyr.

Osyǵan deıin Almaty oblysynda kókónis pen jemisterdi óńdeıtin zaýyttyń qurylysy bastalǵany týraly jazdyq.