Almatyda LRT jelisiniń qurylysyn 2027 jyly bastaý josparlanyp otyr
ALMATY. KAZINFORM – Almatyda LRT jobasynyń tehnıkalyq-ekonomıkalyq negizdemesi ázirlendi.
Bul qujat Almaty qalasynyń jol ınfraqurylymyn damytý basqarmasynyń tapsyrysymen daıyndalǵan. Bas jobalaýshy — «Metroproekt» JShS. «Almaty qalasynyń LRT jelisiniń birinshi kezegin salý» tehnıkalyq-ekonomıkalyq negizdemesi biryńǵaı ekologııalyq portalda qoǵamdyq talqylaýǵa 17 aqpanda shyǵarylǵan.
Qujat málimetteri boıynsha LRT deposy JEO-2 ýchaskesinen shyǵysqa qaraı Farıza Ońǵarsynova, Móńke bı jáne Baýyrjan Momyshuly kósheleriniń aralyǵynda ornalasady. Depodan bastaý alǵan jyldam relsti kólik jelisi B.Momyshuly kóshesimen ońtústik baǵytta Tóle bı kóshesine deıin, sosyn Tóle bı kóshesimen shyǵys baǵytta Abylaı han dańǵylyna deıin júredi. Osy ýchaskeden marshrýt soltústikke qaraı burylyp, Abylaı han dańǵylymen Almaty-2 temirjol vokzalyna deıin jalǵasady. Sońǵy aıaldama «Raıymbek batyr» — kólik-aýysyp otyrý torabynyń aýmaǵynda qarastyrylǵan. Birinshi jeliniń uzyndyǵy 17,893 km ekeni kórsetilgen.
— Jobalanyp otyrǵan LRT jelisi «Daraboz», «13», «Ǵajaıyp», «Nurkent» shaǵyn aýdandaryn, sondaı-aq «Alataý sıtı» men «Almaly» turǵyn úı keshenderin qalanyń ortalyq bóligimen baılanystyrady jáne eki joldy bolady. Jeli negizinen B.Momyshuly, Tóle bı kósheleri men Abylaı han dańǵylynyń boıyndaǵy oqshaýlanǵan jol tósemi arqyly ótedi. Jeli quramynda 34 tramvaı platformasy qarastyrylǵan, onyń ishinde 12-si araldyq tıpti jáne 22-si jol shetindegi tıpti, — delingen qujatta.
Tehnıkalyq-ekonomıkalyq negizdemege sáıkes, LRT jelisi qurylysynyń jalpy uzaqtyǵy — 24 aı bolsa, onyń ishinde qurylystardy buzý men ınjenerlik jelilerdi kóshirýdi esepke alǵandaǵy daıyndyq kezeńi — 7 aıǵa jetedi. Qurylys jobasyn iske asyrý merzimi 2027-2029 jyldarǵa josparlanǵan. 2027 jyldyń ІІ toqsany qurylys bastalyp, 2029 jyldyń ІІ toqsanynda qurylysy aıaqtalýy yqtımal.
«Metroproekt» JShS ázirlegen qujatta tarıhı ortalyq pen ónerkásiptik aýdandar arasynda senimdi kólik baılanysyn qamtamasyz etý úshin bolashaqta LRT jelisiniń 2-shi kezegi salynatyny jazylǵan. Ol «Barlyq» kólik-aýysyp otyrý torabynan Momyshuly kóshesine deıin salynady jáne «Almaty-2» temirjol vokzalyn «Shyǵys qaqpasy» polıortalyǵymen baılanystyrady.
Eske salaıyq, Almatyda LRT salý ıdeıasy 2018 jyldan beri talqylanyp keledi. Alǵashqy joba nusqasynda uzyndyǵy 22,7 shaqyrym bolatyn eki jolda 37 stantsııa qarastyrylǵan. Qozǵalys ıntervaly — eń kóp degende 4 mınýt, al bir táýliktegi jolaýshylar sany 76-112 myń adam bolady dep boljanǵan. Kommertsııalyq ortasha jyldamdyq 22 shaqyrym/saǵ, al jobany júzege asyrý merzimi 2019-2042 jyldar aralyǵynda josparlanǵan edi. Keıin qurylys birneshe ret keıinge shegerildi. 2020 jyly bastaý josparlanǵanymen, TEN boıynsha jobanyń ınvestıtsııalyq quny 94,2 mlrd teńge (QQS-pen birge) dep baǵalanyp, qarjylyq máselelerge baılanysty toqtatylǵan.