Almatyda LRT jelisine arnalǵan depo salynady
ALMATY. KAZINFORM — Alataý aýdanynyń Indýstrııalyq aımaǵynda bolashaq LRT jelisine depo salý josparlanyp otyr.
Jańa depo «Almaty-2» temirjol vokzalyn «Barlyq» jáne «Shyǵys» kólik toraptarymen baılanystyrady. Qazir uzyndyǵy 32,5 shaqyrym bolatyn LRT jelisine arnalǵan tehnıkalyq-ekonomıkalyq negizdeme ázirlenip jatyr.
Bul týraly Almaty ákimi Darhan Satybaldynyń qatysýymen ótken qalanyń kólik ınfraqurylymyn damytý jónindegi keńeste belgili boldy.
Sonymen qatar qazirgi metro jelisin «Qalqaman» stantsııasynan «Barlyq» kólik toraptaryna deıin uzartý jáne ekinshi jelini — «Jibek joly» stantsııasynan áýejaıǵa deıin salý jumystary daıyndalyp jatyr.
Keleshekte «Saırandy» Alataý qalasymen baılanystyratyn úshinshi tarmaqty damytý josparda bar.
Budan bólek, Jeltoqsan kóshesi men Raıymbek batyr dańǵyly boıymen BRT salý, sondaı-aq «Almaty-3» temirjol vokzalynyń qurylysyna daıyndyq máseleleri talqylanyp jatyr.
Ár joba boıynsha naqty merzim men oryndaýshy kórsetilgen jol kartalary ázirlengen.
Eske salaıyq, buǵan deıin «Almaty-3» jańa temirjol vokzalynyń qurylysy qaı kezeńde turǵany týraly jazǵanbyz.
Al Almatydaǵy «Qalqaman» metro stantsııasynyń qurylysy qarjy turaqty túrde bólinse, 2026 jyldyń birinshi jartysynda aqtalýy múmkin.