Almatyda LRT jelisin salý úshin 4 aýdannyń 270 jer ýchaskesi memleketke alynady
ALMATY. KAZINFORM – Almatyda aldaǵy jyldary LRT qurylysy bastalady.
Almaty qalasy ákimdiginiń 2026 jylǵy 26 naýryzdaǵy №1/1-371 qaýlysyna sáıkes, jeńil relsti kóliktiń (LRT) birinshi jelisiniń birinshi kezegin salý úshin («Almaty-2» temirjol vokzalynan Móńke bı kóshesine deıin) Jetisý, Almaly, Áýezov jáne Alataý aýdandarynyń aýmaǵynda ornalasqan 270 jer ýchaskeleri memleket muqtajyna alynady. Májbúrlep ıelikten shyǵarý merzimi 2028 jyldyń 31 jeltoqsanyna deıin belgilengen.
«Qala jer ortalyǵy» menshik ıelerin habardar etedi. Al Almaty qalasy jer qatynastary basqarmasy zańnamamen belgilengen tártipte jer ýchaskeleriniń menshik ıelerine ótemaqy tóleıdi. Jer telimderi memleket menshigine alynǵan soń, Almaty qalasy jol ınfraqurylymyn damytý basqarmasynyń teńgerimine ótedi.
Eske salaıyq, buǵan deıin Almatyda LRT jobasynyń tehnıkalyq-ekonomıkalyq negizdemesi ázirlendi. Qujat málimetteri boıynsha LRT deposy JEO-2 ýchaskesinen shyǵysqa qaraı Farıza Ońǵarsynova, Móńke bı jáne Baýyrjan Momyshuly kósheleriniń aralyǵynda ornalasady. Depodan bastaý alǵan jyldam relsti kólik jelisi B.Momyshuly kóshesimen ońtústik baǵytta Tóle bı kóshesine deıin, sosyn Tóle bı kóshesimen shyǵys baǵytta Abylaı han dańǵylyna deıin júredi. Osy ýchaskeden marshrýt soltústikke qaraı burylyp, Abylaı han dańǵylymen Almaty-2 temirjol vokzalyna deıin jalǵasady. Sońǵy aıaldama «Raıymbek batyr» — kólik-aýysyp otyrý torabynyń aýmaǵynda qarastyrylǵan. 2027 jyldyń ІІ toqsanynda qurylys bastalyp, 2029 jyldyń ІІ toqsanynda qurylysy aıaqtalýy yqtımal.
Almatyda LRT salý ıdeıasy 2018 jyldan beri talqylanyp keledi. Alǵashqy joba nusqasynda uzyndyǵy 22,7 shaqyrym bolatyn eki jolda 37 stantsııa qarastyrylǵan. Qozǵalys ıntervaly — eń kóp degende 4 mınýt, al bir táýliktegi jolaýshylar sany 76-112 myń adam bolady dep boljanǵan. Kommertsııalyq ortasha jyldamdyq 22 shaqyrym/saǵ, al jobany júzege asyrý merzimi 2019-2042 jyldar aralyǵynda josparlanǵan edi. Keıin qurylys birneshe ret keıinge shegerildi. 2020 jyly bastaý josparlanǵanymen, TEN boıynsha jobanyń ınvestıtsııalyq quny 94,2 mlrd teńge (QQS-pen birge) dep baǵalanyp, qarjylyq máselelerge baılanysty toqtatylǵan.
