Almatyda LRT jelisin kim salady jáne qansha qarajat bólindi
ALMATY. KAZINFORM – Almatyda alǵashqy LRT jelisiniń qurylysymen aınalysatyn kompanııa anyqtaldy.
Almatyda jyldam relsti kólik qurylysy qarqyn aldy. Bıyl aqpan aıynda almatylyq LRT jobasynyń tehnıkalyq-ekonomıkalyq negizdemesi daıyn boldy. Ol qazir memlekettik saraptamadan ótip jatyr.
Al sáýir aıynda LRT qurylysyna daıyndyq jumystary bastalyp, Tóle bı kóshesinde burynǵy tramvaı relsteri bólshektele bastady. Al jınalǵan materıaldar «Almatyelektrkólik» JShS-yna beriledi.
Endi jańa qoǵamdyq kólik túriniń qurylysymen aınalysatyn kompanııalar belgili boldy. Almaty ákiminiń Beıjiń qalasyna jasaǵan jumys sapary aıasynda Qytaıdyń CRRC kompanııasy jáne qazaqstandyq «Integra Construction KZ» JShS arasynda LRT jobasyn iske asyrý jáne jyljymaly quramdy jetkizý jónindegi memorandýmǵa qol qoıyldy. Jobaǵa tapsyrys berýshi - Almaty qalasynyń jol ınfraqurylymyn damytý basqarmasy.
Osy oraıda Almatynyń kólik júıesi úshin mańyzdy jobany qolǵa alǵan qazaqstandyq kompanııaǵa toqtalyp ótýdi jón kórdik. Kompanııanyń resmı saıtynda 1998 jyly «Integra Construction KZ» JShS-nyń negizi qalanǵany kórsetilgen. Negizgi jumys baǵyttary temir jol qurylysy, avtomobıl joldaryn rekonstrýktsııalaý men jóndeý, turǵyn úı qurylysy jáne basqa da baǵyttar bar.
«Integra Construction KZ» JShS-nyń benefıtsıarlyq menshik ıesi - Mútálip Shahmurat. Ol 2024 jyldan beri Qazaqstan boks federatsııasynyń prezıdenti, 2025 jyldan bastap QR Ulttyq Olımpıadalyq komıteti Halyqaralyq yntymaqtastyq jónindegi vıtse-prezıdenti qyzmetin atqaryp keledi.
Memlekettik kirister departamenti usynǵan derekterge súıensek, kompanııa 2025 jyly 22,7 mlrd teńge salyq tólegen. Al 2026 jyldyń eseptik kezeńi boıynsha 16,4 mlrd teńge salyq tólep úlgergen. Qazirgi ýaqytta atalǵan kompanııa júzege asyryp jatqan iri jobalardyń biri - «Moıynty-Qyzyljar» temirjol jelisiniń qurylysy. Sondaı-aq 2025 jyly qazan aıynda «Baǵanashyl» balalar úıi boıynsha jóndeý jumystaryn júrgizý mindettemesin «Integra Construction KZ» JShS óz moınyna alǵan bolatyn.
LRT qurylysyna qansha qarajat bólindi
Ótken aptada Almatyda qalalyq máslıhattyń kezekti sessııasy ótti. Jıyn barysynda qalanyń qoǵamdyq kólik júıesin damytýǵa bólingen qarajaty naqtylandy. Onyń ishinde LRT qurylysyna qajet soma ataldy.
- Qoǵamdyq kólik júıesindegi negizgi jobalardyń biri - LRT qurylysy. Ony iske asyrýǵa 61,4 mlrd teńge kózdelip otyr. Uzyndyǵy 18,3 km bolatyn LRT jobasynyń birinshi kezeńi 2027 jyldyń jeltoqsanynda aıaqtalady, - dedi Almaty qalasy Ekonomıka jáne qarjy basqarmasynyń basshysy Baýyrjan Qudaıbergenov.
Eske salaıyq, Almatyda LRT deposy Farıza Ońǵarsynova, Móńke bı jáne Baýyrjan Momyshuly kósheleriniń aralyǵynda ornalasady. Depodan bastaý alǵan jyldam relsti kólik jelisi Momyshuly kóshesimen ońtústik baǵytta Tóle bı kóshesine deıin, sosyn Tóle bı kóshesimen shyǵys baǵytta Abylaı han dańǵylyna deıin júredi. Osy ýchaskeden marshrýt soltústikke qaraı burylyp, Abylaı han dańǵylymen Almaty-2 temirjol vokzalyna deıin jalǵasady.
Qazirgi ýaqytta LRT qurylysy úshin Jetisý, Almaly, Áýezov jáne Alataý aýdandarynyń aýmaǵynda ornalasqan 270 jer telimin memleket muqtajyna alý jumystary júrgizilip jatyr.
