Almatyda LRT qurylysynyń jańa kezeńi bastalady

Jol qozǵalysyn uıymdastyrý ortalyǵynyń málimetinshe, Tóle bı kóshesiniń Momyshuly kóshesinen Jarokov kóshesine deıingi shyǵys baǵytyndaǵy ýchaskesinde burynǵy tramvaı jelisiniń baılanys torabyna tıesili qoldanystaǵy tirekter alynady. Olardyń ornyna syrtqy jaryqtandyrýdyń jańa sándik tirekteri ornatylady.

Qazirgi ýaqytta qoldanystaǵy tirekterde áýe elektr berý jelileri, baılanys jelileri, ınternet-provaıderlerdiń jelileri, jarnamalyq qurylymdar jáne basqa da ınjenerlik kommýnıkatsııalar ornalasqan. Alaıda keı jelilerdiń menshik ıeleri nemese paıdalanýshy uıymdary áli kúnge deıin anyqtalmaǵan.

- Buǵan deıin Almaty qalasynyń Tsıfrlandyrý basqarmasy baılanys operatorlaryna, ınternet-provaıderlerge, kommýnaldyq kásiporyndarǵa jáne ınjenerlik jelilerdiń ózge de menshik ıelerine kommýnıkatsııalardy kóshirý nemese qaıta ornalastyrý qajettigi týraly habarlama joldaǵan bolatyn. Alaıda menshik ıeleriniń bir bóligi búgingi kúnge deıin qajetti jumystardy oryndamaǵan nemese olardyń kimge tıesili ekeni anyqtalmaǵan, - dep túsindirdi ortalyqtan.

Injenerlik jelilerdiń zaqymdanýyna, sondaı-aq elektrmen jabdyqtaý, baılanys jáne ınternet qyzmetiniń úzilýine jol bermeý maqsatynda Jol qozǵalysyn uıymdastyrý ortalyǵy osy aımaqtaǵy uıymdar men turǵyndarǵa úndeý jasady. Atap aıtqanda: 2026 jyldyń 24 shildesin qosqanda Tóle bı kóshesinde (Momyshuly kóshesinen Jarokov kóshesine deıin) ornalasqan, ózderine tıesili jelilerdi alyp tastaý nemese basqa orynǵa kóshirý jumystaryn aıaqtaý qajet.

25 shildeden bastap atalǵan ýchaskede burynǵy baılanys torabynyń 165 qoldanystaǵy tiregin alyp tastaý jáne syrtqy jaryqtandyrýdyń jańa tirekterin ornatý jumystary bastalady. Jobaǵa sáıkes, qurylys aıaqtalǵannan keıin qoldanystaǵy áýe jelilerin jańa tirekterge qaıta ornalastyrý qarastyrylmaǵan.

Eske salaıyq, bıyl kóktemde LRT qurylysyna daıyndyq aıasynda Almatyda burynǵy tramvaı relsteri alyna bastady.

Buǵan deıin Almatyda LRT jelisin kim salatynyn jáne qansha qarajat bólingenin jazǵanbyz.