Almatyda LRT qurylysynyń qarqyny qalaı - ákimdikten jaýap berdi
ALMATY. KAZINFORM – Almatyda ótken máslıhat sessııasynda LRT qurylysy týraly aıtyldy.
Depýtattar jeńil relsti kólik salynyp jatqan keı ýchaskelerde qurylys qarqyny tómen ekenin aıtyp, qazirgi atqarylyp jatqan jumystar týraly surady. Oǵan Almaty qalasy jol ınfraqurylymyn damytý basqarmasy Oljas Shabdanov jaýap berdi.
- Búgin uzyndyǵy 18,3 km bolatyn LRT birinshi jelisiniń qurylys jumystary bekitilgen kestege saı júrgizilip jatyr. Osy joba aıasynda ýchaskede 80-ge jýyq jumysshy men 50-den astam arnaıy qurylys tehnıkasy jumyldyrylǵan, - dedi ol.
Oljas Shabdanov joba aıasynda ınjenerlik jelilerdi kóshirý, sonyń ishinde 282 ınjenerlik jeli ótkelin aýystyrý qarastyrylǵanyn atap ótti. Onyń sózinshe, qazirge deıin 90 ótkel boıynsha jumystar tolyq aıaqtalǵan. Jalpy ınjenerlik jelilerdi kóshirý jumystaryn bıyl qarasha aıynyń sońyna deıin aıaqtaý josparlanyp otyr.
- Sonymen qatar Momyshuly kóshesinde shpaldardy tóseý arqyly joldyń ústińgi qurylysyn salý jumystaryna kiristik. Qazirgi ýaqytta 1600-ge jýyq temirbeton shpal tóselip, 600 metr rels ornatyldy. Al Tóle bı kóshesi boıyndaǵy jumystar ınjenerlik jelilerdi qarashanyń sońyna deıin bitirýdi kózdep otyrmyz. Al jobany kelesi jyldyń jeltoqsan aıynda aıaqtaý josparlanǵan, - dedi ol.
Sondaı-aq vedomstvo basshysy LRT jelisi bolashaqta qalaı uzartylatynyn túsindirdi. Aıtýynsha, salynyp jatqan jeli batys baǵytta Tóle bı kóshesiniń boıymen «Barlyq» bazaryna deıin uzartylady. Al shyǵys bóliginde jeli jańadan salynyp jatqan stadıonǵa deıin jetkiziledi.
LRT birinshi jelisiniń birinshi kezeńi Alataý aýdanyndaǵy ındýstrııalyq aımaqta, Móńke bı jáne Momyshuly kósheleriniń mańynda ornalasatyn depodan bastalady. Jeli Momyshuly kóshesimen Tóle bı kóshesine, odan ári shyǵys baǵytta Abylaı han dańǵylyna jalǵasady. «Almaty-2» temirjol vokzaly janynda sońǵy stantsııa retinde «Raıymbek batyr» kólik-aýysý toraby qarastyrylǵan.
Eske salaıyq, 2026 jyldyń basynda Almatydaǵy LRT jobasynyń tehnıkalyq-ekonomıkalyq negizdemesi ázirlendi.
Bıyl sáýir aıynda Almatyda burynǵy tramvaı relsteri alynyp, LRT qurylysyna daıyndyq bastaldy.
