Almatyda LRT qurylysy júrip jatqan kósheniń keı ýchaskelerinde jol oıyldy
ALMATY. KAZINFORM – Almatyda jaýyn-shashynǵa baılanysty Momyshuly kóshesindegi keı ýchaskelerde jol tósemi shógip, kólik qozǵalysy qıyndady.
Áleýmettik jelide sý tolǵan jol ortasyndaǵy oıyqtardan kólikterdiń qıyndyqpen ótip jatqany týraly beınejazbalar tarady. Sondaı-aq jelide turǵyndar osy sebepti kóshede keptelis paıda bolyp, avtobýstardyń jańbyrly kúni aıaldamaǵa kelmeı jatqany týraly jazǵan.
Kazinform tilshisi mundaı ýchaskelerdiń birine baryp kórdi. Móńke bı kóshesine jaqyn Momyshuly kóshesiniń boıynda eki baǵytta da jol júrisi qıyndaǵan. Sebebi jol birneshe tustan qazylyp, jol tósemi tolyqtaı qalpyna keltirilmegen. Al bir tusynda úlken oıyq paıda bolǵan. Onda qazir jol tósemin qalypyna keltirý jumystary júrip jatyr.
Atalǵan jaǵdaıǵa baılanysty Almaty qalasynyń jol ınfraqurylymyn damytý basqarmasy túsinikteme berdi.
Vedomstvo málimetinshe, LRT jobasyn iske asyrý aıasynda Momyshuly jáne Tóle bı kósheleriniń ýchaskelerinde ınjenerlik jelilerdi qaıta qurý jumystary júrgizilgen. Jaýyn-shashynnyń mol túsýine baılanysty jekelegen ýchaskelerde topyraq shógip ketken.
- Qazirgi ýaqytta merdiger uıym qalpyna keltirý jumystaryn júrgizip jatyr. Atalǵan jumystar jol negizin nyǵyzdaýdy jáne kólik quraldarynyń qaýipsiz ótýin qamtamasyz etý maqsatynda ýaqytsha shara retinde frezerlengen asfaltbetondy qoldanýdy qamtıdy. Aýa raıy jaǵdaılary turaqtanǵannan keıin asfaltbeton jabyny tehnologııalyq talaptarǵa sáıkes qalpyna keltiriledi, - dep habarlady basqarmadan.
Eske salaıyq, buǵan deıin Almatyda aýa raıynyń nasharlaýyna baılanysty kommýnaldyq jáne tótenshe jaǵdaılar qyzmetteri kúsheıtilgen kezekshilik rejımine kóshkenin jazǵanbyz.
