Almatyda Louis Vuitton jáne Nesquik brendterimen jalǵan ónimder tárkilendi
ASTANA. KAZINFORM – Almaty qalasynda álemge tanymal «Louis Vuitton» jáne «Nesquik» taýar belgilerin zańsyz paıdalaný faktileri anyqtaldy, dep habarlaıdy Ádilet mınıstrligi.
Vedomstvo málimetinshe, Almaty qalasy Ádilet departamenti zııatkerlik menshik quqyqtaryn qorǵaý salasyndaǵy memlekettik saıasatty iske asyrý aıasynda tanymal brendterdiń taýar belgilerin zańsyz paıdalanýdy anyqtaý jáne onyń jolyn kesý boıynsha is-sharalar júrgizgen.
Almaty qalasy Polıtsııa departamentiniń kıberpolıtsııa bólimshesimen birlesip júrgizilgen tekserý barysynda «Nesquik» taýar belgisin zańsyz paıdalaný faktisi anyqtalǵan. Qala aýmaǵynda tirkelgen taýar belgisimen shatastyrý dárejesine deıin uqsas belgilerdi paıdalaný arqyly ónimder zańsyz ótkizilgen.
Nátıjesinde zańsyz aınalymnan jalpy quny 4 mln teńgeden asatyn 2000-nan astam ónim tárkilendi.
- Sonymen qatar jospardan tys tekserý barysynda «Louis Vuitton» taýar belgisin zańsyz paıdalaný derekteri tirkeldi. Anyqtalǵandaı, ónimderdiń sapasy tómen bolǵan jáne olar zańnama talaptaryn buza otyryp satylǵan.
Zańsyz aınalymnan júzdegen kontrafaktilik ónim tárkilendi.
Atalǵan quqyqbuzýshylyqtar boıynsha ákimshilik hattamalar toltyrylyp, kináli tulǵalardy jaýapkershilikke tartý úshin materıaldar sotqa joldandy, - delingen aqparatta.
Ádilet organdary júrgizip otyrǵan jumys adal básekelestikti qamtamasyz etýge, quqyq ıelenýshilerdiń quqyqtaryn qorǵaýǵa jáne kontrafaktilik ári áleýetti qaýipti ónimderdiń aınalymynyń aldyn alýǵa baǵyttalǵan.
Aıta keteıik, UQK Shekara qyzmeti 60 mln teńgelik temeki kontrabandasynyń jolyn kesti.
