Almatyda LEZ jobasy aıasynda jol belgileri ornatylyp jatyr
ALMATY. KAZINFORM – Almatyda tómen emıssııa aımaǵynyń (LEZ) pılottyq jobasy aıasynda jol belgileri men aqparattyq taqtalaryn ornatý jumystary bastaldy.
«Almaty parkıng» ShJQ KMK habarlaýynsha, aqparattyq qurylymdar Bógenbaı batyr – Jeltoqsan – Abaı – Dostyq kósheleriniń aýmaǵyndaǵy pılottyq aımaqqa kireberisterde ornalastyrylyp jatyr.
Joba aıasynda jalpy sany 134 jol belgisi men aqparattyq taqta ornatý kózdelgen. Olardyń qatarynda tómen emıssııa aımaǵyna kireberisti bildiretin 5.50 ekologııalyq jol belgileri, aımaqtan shyǵýdy kórsetetin 5.51 belgileri, sondaı-aq jol qozǵalysyna qatysýshylarǵa arnalǵan aqparattyq taqtalar bar.
Mekeme ókilderiniń málimetinshe, jol belgilerin ornatý bıyl 28 sáýirde bastalǵan LEZ jobasynyń tehnıkalyq pılottyq kezeńiniń bir bóligi sanalady. Qazirgi kezeńde kólik qozǵalysyna eshqandaı shekteý qoıylmaıdy, aıyppul salý nemese aımaqqa kirý úshin tólem alý qarastyrylmaǵan.
– Pılottyq jobanyń negizgi maqsaty – tsıfrlyq ınfraqurylymdy synaqtan ótkizý, kólik legin esepke alý júıelerin baptaý, sondaı-aq kóliktiń atmosferalyq aýa sapasyna áserin baǵalaý úshin derekterdi jınaý jáne taldaý, - delingen habarlamada.
Mamandardyń aıtýynsha, pılottyq rejım tsıfrlyq servısterdiń, aqparattyq júıelerdiń jáne ákimshilendirý tetikteriniń jumysyn jobany odan ári damytý jónindegi sheshim qabyldanǵanǵa deıin tekserýge múmkindik beredi.
Aıta keteıik, tehnıkalyq pılottyq kezeń 2026 jyly 31 jeltoqsanǵa deıin jalǵasady. Osy ýaqyt aralyǵynda aımaq aýmaǵyndaǵy kólik qozǵalysy qalypty rejımde júzege asyrylady.
Eske salaıyq, buǵan deıin almatylyq júrgizýshilerge LEZ aımaǵyna kirgeni týraly habarlama kele bastaǵanyn jazǵanbyz.
