Almatyda LEZ aımaǵynyń shekteýleri men jumys tártibi túsindirildi
ALMATY. KAZINFORM – Qazir Almatydaǵy shyǵaryndylary tómen aımaq (LEZ) pılottyq rejımde jumys istep tur.
2026 jyly 28 sáýirde iske qosylǵan pılottyq joba jyl sońyna deıin jalǵasady. Bul týraly zań shyǵarý salasynyń sarapshysy, Almatynyń atmosferalyq aýasyn qorǵaý qaǵıdalaryn ázirleý jónindegi jumys tobynyń jetekshisi Erlan Buzyrbaev aıtty.
- Pılottyq rejımde avtokólikterdi mindetti túrde tehnıkalyq tekserýden ótkizý, aımaqqa kirgeni úshin aqy alý, qozǵalysty shekteý nemese aıyppul salý qarastyrylmaǵan. Qazir avtokólik ıeleriniń tehnıkalyq tekserýden ótýi erikti. Al odan ótpeý eshqandaı quqyqtyq saldarǵa ákep soqpaıdy, – dedi ol.
Onyń aıtýynsha, Almatynyń geografııalyq erekshelikterin eskere otyryp, pılottyq joba qorytyndysy boıynsha LEZ shekarasyn búkil qala aýmaǵynda belgileý máselesi qarastyrylady.
Erlan Buzyrbaev Almaty taý bókterindegi oıysta ornalasqandyqtan, mundaǵy klımattyq jáne tabıǵı jaǵdaılar lastaýshy zattardyń aýada tabıǵı jolmen taralýyna kedergi keltiretinin atap ótti. Sondyqtan atmosferalyq aýanyń lastanýy keıbir aýdandar nemese kóshelermen shektelmeýi qajet. Sarapshy pikirinshe, LEZ aýmaǵyn tym tar sheńberde belgileý onyń ekologııalyq tıimdiligin tómendetýi múmkin.
- LEZ-di turaqty rejımge kóshirý úshin Almaty qalasy ákimdiginiń shyǵaryndylary tómen aımaqtyń shekarasyn belgileý týraly jeke qaýlysy qajet. Bul qaýly qabyldanǵanǵa deıin qazirgi shekaralar tek pılottyq joba aıasynda qoldanylady, – dedi sarapshy.
Eske salaıyq, bıyl Almatyda LEZ jobasy aıasynda jol belgileri ornatyldy.
