Almatyda LEZ aımaǵyn engizý jumysy qalaı júrip jatyr
ALMATY. KAZINFORM – Almatyda atmosferalyq aýanyń lastanýyn azaıtý úshin tómen shyǵaryndylar aımaǵyn (LEZ) engizý jobasy qolǵa alyndy.
Almaty qalasy Ekologııa jáne qorshaǵan orta basqarmasy basshysynyń orynbasary Arshat Bahtygereevtiń aıtýynsha, 2025 jyly 30 jeltoqsanda qalalyq máslıhat atmosferalyq aýany qorǵaý qaǵıdalaryn bekitti. Negizgi lastaý kózderin qamtıtyn qujat shyǵaryndylardy, onyń ishinde avtokólik shyǵaryndysyn azaıtý jónindegi talapty belgiledi. Nátıjesinde 2026 jyldyń 28 sáýirinen bastap tómen shyǵaryndylar aımaǵyn (LEZ) engizýdiń pılottyq jobasy iske qosyldy. Ol Bógenbaı batyr kóshesi, Abaı dańǵyly, Jeltoqsan kóshesi jáne Dostyq dańǵyly shekaralaryndaǵy aýmaqta qoldanylyp jatyr.
- 2026 jyldyń sońyna deıin LEZ testilik rejımde jumys isteıdi. Bul kezeńde júrgizýshiler úshin aımaqqa kirý aqysy, aıyppul jáne kólik qozǵalysyna shekteý qarastyrylmaǵan. Qazir tehnıkalyq sheshimder, derek almasý jáne júıege qatysýshylardyń ózara is-qımyly pysyqtalyp jatyr. Pılottyq aımaqta 134 jol belgisi ornatylyp, 15 kóshege jol tańbasy salyndy, - dedi vedomstvo ókili.
Onyń sózinshe, LEZ negizgi qaǵıdaty – avtokóliktiń naqty shyǵaryndylar deńgeıine qatysty. Sondyqtan tetiktiń mańyzdy bóligi – benzınmen jáne gazben júretin avtokólikterdiń paıdalanylǵan gazdarynyń ýyttylyǵyn, al dızeldi kólikterdiń tútin shyǵarý deńgeıin ólsheı otyryp, tehnıkalyq tekserý júrgizý qajet.
LEZ aımaǵyna qatysty Almatynyń atmosferalyq aýasyn qorǵaý qaǵıdalaryn ázirleý jónindegi jumys tobynyń jetekshisi Erlan Buzyrbaev pikir bildirdi.
Aıtýynsha, avtokólik gazdary men tútini qaladaǵy zııandy zattar shyǵaryndylarynyń jalpy kóleminiń shamamen 60%-yn alady. Sondyqtan jumys eski kólikterge tyıym salýǵa emes, belgilengen ekologııalyq normatıvten asyp túsetin avtokólikterdi anyqtaýǵa baǵyttalýy tıis.
- Bir jyly shyǵarylǵan jáne bir ekologııalyq klasqa jatatyn eki kóliktiń shyǵaryndysy ártúrli bolýy múmkin. Sondyqtan júıe ár kóliktiń naqty jaǵdaıyn baǵalaýy kerek, – dedi Erlan Buzyrbaev.
Sarapshynyń aıtýynsha, avtokóliktiń jyly ony paıdalanýǵa shekteý qoıýǵa ózdiginen negiz bolmaıdy. Tehnıkalyq turǵydan jaramdy kólik shyǵarylǵan jylyna qaramastan tekserýden óte alady.
Eske salaıyq, buǵan deıin Almatyda 1 qyrkúıekten bastap avtokólikter tehnıkalyq tekserýden ótýi tıis ekenin jazǵanbyz.
