Almatyda laı kóshkininiń túsýine zańsyz salynǵan qurylys sebep boldy
ALMATY. KAZINFORM – Almatyda Kereı-Jánibek handar kóshesi boıynda sazdy laı kóshkini tústi. Saldarynan asfalttyń bir bóligi isten shyǵyp, káriz jelileri bitelip qaldy.
Almaty ákimdiginiń málimetinshe, qazirgi ýaqytta kommýnaldyq qyzmetter sazdy laıdy sorý jumystaryn júrgizip jatyr. Kún raıy jaqsarǵanan keıin jol jabyny qaıta tóseledi.
«Tekserý barysynda sazdy laıdyń jyljyýy taý bókteri bir bóliginiń oıylýy jáne «Muztaý» shaǵyn aýdanynda salynǵan qurylystardyń saldarynan bolǵandyǵy anyqtaldy. Taýly qyrat eldi mekenindegi 2768 ýchaskede qurylys salý kezinde ekojúıe buzylǵandyǵy anyqtaldy. Menshik ıesi (jeke tulǵa) taý bókteriniń bir bóligin óz betinshe oıyp alyp, jyrany jaýyp tastaǵan. Sonyń saldarynan sýdyń tabıǵı aǵyny jabylyp, qatty jaýyn-shashyn kezinde jasandy topyraqta jaryqshaq paıda bolǵan», - dep habarlady ákimdikten.
Ákimdikten atap ótkendeı, menshik ıesi sharýa qojalyǵyn júrgizý úshin nysanaly maqsaty bar jer ýchaskesinde ruqsat qujattary joq qurylys jumystaryn bastaǵan. Qazirgi ýaqytta nysandaǵy qurylys-montaj jumystary toqtatyldy.
«Almaty qalasynyń qala qurylysyn baqylaý basqarmasy menshik ıesine qatysty jospardan tys tekserýge bastamashylyq jasaýda. Onyń nátıjesi boıynsha jer ýchaskesin bastapqy qalpyna keltirý úshin jiberilgen buzýshylyqtardy joıýǵa nusqama bere otyryp, QR ÁQBtK-niń 316-baby 1-bóligi boıynsha ákimshilik sharalar qabyldaıtyn bolady», - dep habarlady ákimdikten.
Jalpy, aýdan boıynsha aýa raıy boljamyna baılanysty kommýnaldyq qyzmetterdiń jumysy aldyn ala kúsheıtilip, kezekshilik uıymdastyryldy. Sý basý qaýpi bar aımaqtardaǵy ýchaskeler Almaty ákimdiginiń baqylaýynda.
