Almatyda laı kóshkini qaıtalanbaıdy — TJD
ALMATY. KAZINFORM — Almatyda laı kóshkini júrgen aımaqta qaýip seıildi. Eńisti zertteý qorytyndysy boıynsha komıssııa laı kóshkininiń qaıta túsý qaýpi joq degen qorytyndyǵa keldi.
Qalalyq tótenshe jaǵdaılar departamentinen málim etkendeı, Medeý aýdanynda arnaıy komıssııa jumys istep jatyr.
Onyń quramyna tótenshe jaǵdaılar departamenti, Qazseldenqorǵaý jáne qala ákimdiginiń mamandary bar.
Negizgi maqsat — oqys oqıǵa bolǵan taý mańyn qaýipsizdik pen turaqtylyqqa tekserý.
«8 aqpan saǵat 15:00–degi jaǵdaı boıynsha komıssııa zertteý qorytyndysy boıynsha jaqyn mańdaǵy úılerdiń turǵyndary úshin qaıta laı kóshkininiń túsýine qaýip joq degen sheshimge keldi», — dep atap ótti vedomstvodan.
Komıssııa ókilderiniń sózinshe, 8 aqpanda 3000 tekshe metrden astam laı kóshkini tústi.
Joǵaryda áli 300-400 tekshe metr bos massa bar, ol qazirgi ýaqytta mamandardyń kúshimen tazartylyp, qaýipsiz jaǵdaıda tómen túsirilip jatyr.
Sonymen qatar, komıssııa músheleri bolǵan oqıǵanyń sebepterin anyqtaý boıynsha jumysty jalǵastyrýda.
«Komıssııa barlyq múmkin faktorlardy egjeı-tegjeıli zerttep jatyr. Tergeý qorytyndysy boıynsha komıssııa jumysynyń nátıjesi habarlanady. Resmı derekterge senýińizdi suraımyz», — dep habarlady departamentten.
Medeý aýdandyq polıtsııa basqarmasy qylmystyq is qozǵady, ony quzyretti organdar tekseredi.
Esterińizge sala keteıik, 8 aqpanda Medeý aýdanynyń «Taý samaly» shaǵynaýdanyndaǵy Olımpıskıı kóshesi boıynda tehnogendik sıpattaǵy topyraqtyń laılanýy saldarynan laı kóshkini boldy.
Keıin Almaty qalasy tótenshe jaǵdaılar departamenti men respýblıkalyq jedel-qutqarý jasaǵynyń kúshteri úıindi astynan tórt adamnyń denesin tapty.
Onyń bári bir otbasynyń múshesi — 1984 jyly týǵan er adam, 1980 jyly týǵan áıel jáne 2007 jylǵy egiz jasóspirim ul balalar.
