Almatyda laı kóshkini qaýpi bar aımaqtarda ne isteledi - ákim jaýap berdi

ALMATY. KAZINFORM – Almaty qalasynyń ákimi Erbolat Dosaev Medeý aýdanynyń turǵyndarymen kezdesti. Kezdesý barysynda aýdan turǵyny laı kóshkininiń qaýpine baılanysty suraq qoıdy.

— Buryn bolǵan laı kóshkininen keıin «Kamenskoe plato» («Taý samaly» shaǵyn aýdany) turǵyndary qaýipti betkeılerdegi jerlerdiń satylýyna alańdaýly. Áleýmettik jelilerde geografııa ınstıtýty jasaǵan qaýipti aımaqtardyń kartasyn jarııalaýdy suraımyz. Sosyn qaýipti aımaqtarda eskertý belgileri qoıylsa eken, — dedi Medeý aýdanynyń turǵyny.

Sondaı-aq ol shaǵyn aýdandaǵy qarqyndy qurylysqa baılanysty júk kólikterdiń joldy buzyp jatqanyn aıtyp, osy máseleni qarastyrýdy ótindi.

— «Kamenskoe plato» qalaı salynǵanyn bilesizder. Nátıjesinde osy máseleler týyndap otyr. Endi biz 74 ýchaskeni tıisti aýdıt júrgizdik. Asa qaýipti 11 ýchaskege baılanysty shara qoldanyp jatyrmyz. Beseýine joba jasalyp, ákimdiktiń tótenshe jaǵdaılarǵa arnalǵan rezervinen aqsha bólindi. Al qalǵan altaýyn satyp alamyz. Ol ýchaskelerdi bekitýge kelmeıdi, tek jerdi satyp alyp, adamdardy kóshirý kerek, — dedi qala ákimi.

Sondaı-aq Erbolat Dosaev shaǵyn aýdanda sý jáne káriz jelileri júrgizilgennen keıin sapaly joldar salynatynyn atap ótti.

Eske salaıyq, 8 aqpan kúni Medeý aýdanynyń «Taý samaly» shaǵyn aýdanyndaǵy Olımpıskıı kóshesi boıynda tehnogendik sıpattaǵy topyraqtyń laılanýy saldarynan laı kóshkini boldy. 

Keıin Almaty qalasy tótenshe jaǵdaılar departamenti men respýblıkalyq jedel-qutqarý jasaǵynyń kúshteri úıindi astynan tórt adamnyń denesin tapty.