Almatyda laı kóshkini qaýpi bar aımaqtarda qandaı jumys atqarylyp jatyr
ALMATY. KAZINFORM – Medeý aýdanynyń ákimi Erkebulan Orazalın ótken jyly bolǵan qaıǵyly oqıǵadan keıin qalanyń kóshkin qaýpi bar aýmaqtarda júrgizilip jatqan jumystary týraly aıtyp berdi.
Byltyr 8 aqpan kúni Medeý aýdanynyń «Taý samaly» shaǵyn aýdanyndaǵy Olımpıskıı kóshesi boıynda tehnogendik sıpattaǵy topyraqtyń laılanýy saldarynan laı kóshkini boldy. Keıin Almaty qalasy Tótenshe jaǵdaılar departamenti men respýblıkalyq jedel-qutqarý jasaǵynyń kúshteri úıindi astynan tórt adamnyń denesin tapty.
— Atalǵan aýmaqta jalpy betkeıdiń jáne onyń etegindegi turǵyn úıler men jeke qurylystardyń qaýipsizdigin qamtamasyz etý maqsatynda tótenshe jaǵdaı rejımi aıasynda tıisti jumystar júrgizildi. Qazir atqarylǵan sharalar kórshiles aýdandarda turatyn turǵyndar úshin qaýipsizdikti qamtamasyz etip otyr, - dedi aýdan ákimi.
Onyń aıtýynsha, bul jerde 1 500 sharshy metr aýmaq tazartyldy, 800 tekshe metr beton qurylymy buzylyp, 900 tekshe metr gabıon qurylymy ornatyldy. Odan bólek 772 metr jaýyn-shashynǵa arnalǵan aryq júıesi salyndy, «Sakýra» turǵyn úı kesheniniń aýmaǵynda 772 sharshy metrge brýschatka tóseldi jáne 2 660 sharshy metrlik tor bekitildi. Qurylys jumystaryna jalpy 1,5 mlrd teńge jumsalǵan.
Sonymen qatar Erkebulan Orazalın ótken jyly Medeý aýdany boıynsha 82 kóshkin qaýpi bar aýmaq anyqtalǵanyn atap ótti .
— Biz túrli ádisterdi qoldandyq. Keı jerlerde bıýdjet esebinen naqty jumystar atqaryldy. Jekelegen ýchaskeler R1 aımaǵyna engizildi, onda qurylys salýǵa shekteý qoıyldy. Qaýiptiń aldyn alý boıynsha keshendi sharalar júrgizilip, jaǵdaı turaqty baqylaýda tur, - dedi ol.
Eske salaıyq, jyl basynda Almatyda laı kóshkini qaýpi bar ýchaskeler nyǵaıtylyp jatqanyn jazǵanbyz.