Almatyda kúzde 53 myń túp aǵash otyrǵyzylady
ALMATY. KAZINFORM — Almaty ákimi Darhan Satybaldy kúzgi aǵash otyrǵyzý, kóshelerdi sanıtarlyq tazalaý jáne qalalyq ortany abattandyrýdyń jańa standarttaryn engizý boıynsha keńes ótkizdi.
Josparǵa sáıkes, kúzde megapolıste 53 myńnan astam aǵash otyrǵyzý kózdelip otyr, onyń ishinde bıiktigi 4-5 metr bolatyn 9,3 myń iri kóshet bar. Sonymen qatar, kesilgen aǵashtyń ornyna 22 myńnan astam tal egý jáne 356 myń butaqtan turatyn býferlik jasyl aımaqtar qurý josparda.
Alataý, Naýryzbaı jáne Jetisý aýdandaryna erekshe nazar aýdarylady. Jumystar avtomatty sýarý júıesin ornatý jónindegi buryn ázirlengen josparǵa (52 ýchaske, 290 km) jáne ázirlenip jatqan dendrologııalyq josparǵa sáıkes júrgiziledi. Qalalyq tálimbaq qurýǵa daıyndyq jumystary jalǵasyp jatyr, jobalyq jumystar 2026 jyldyń sońyna deıin aıaqtalady.
— Kósheler men qoǵamdyq keńistikterdi keshendi abattandyrý baǵdarlamasy usynyldy. Baǵdarlamanyń negizgi elementi retinde skverler, býlvarlar, jaıaý júrginshiler kósheleri men shaǵyn jasyl aımaqtardy kútip-ustaýmen ortalyqtandyrylǵan túrde aınalysatyn «Jasyl Almaty» KMM-in qurý kózdelip otyr. Baǵdarlama aıasynda abattandyrý men kógaldandyrý boıynsha biryńǵaı standarttar engiziledi, — delingen ákimdik taratqan aqparatta.
Landshaftyq dızaındy damytýǵa, kópjyldyq ósimdikter úlesin arttyrýǵa, avtomatty sýarý jáne jaryqtandyrý júıelerin engizýge, sondaı-aq, jaıly ári qaýipsiz qalalyq orta qurýǵa erekshe nazar aýdarylady.
Sonymen birge, sanıtarlyq tazalaýdyń biryńǵaı reglamenti ázirlenip jatyr. Qujatta jumystardyń sapasyna qoıylatyn naqty talaptar, qolmen jáne tehnıkamen tazalaý kóleminiń esebi, qyzmetker sanyna qatysty normatıvter men olarǵa yńǵaıly etip beıimdelgen jańartylǵan keste qamtylady.
Qala ákimi Darhan Satybaldy bólingen qarajattyń maqsatty paıdalanylýyna baqylaýdy kúsheıtýdi tapsyrdy.
Onyń aıtýynsha, eger abattandyrýǵa aqsha bólinse, onda ol boıynsha naqty nátıje bolýǵa tıis.
— Merdigerler men vedomstvolyq mekemeler jumysty naqty atqarýy kerek. Kóp jerde sýarý júıesi istemeıdi, jer telimi qyzmet kórsetiletin aımaq retinde tirkelgenimen, is júzinde kútim jasalmaıdy. Muny túzeý qajet. Aýdan ákimdikteri arqyly bólinetin qarjy qatań baqylaýda bolýǵa tıis, — dedi ákim.
Aıta keteıik, Almatyda sońǵy eki jylda 1 mln-nan astam aǵash otyrǵyzyldy.