Almatyda qurylys salýshylar úleskerlerdi 2,5 mlrd teńgege aldap ketti

ALMATY. KAZINFORM – Almatyda prokýrorlar úleskerlerdi 2,5 mlrd teńgege aldaǵan qurylys kompanııasynyń basshylaryna qatysty isti tergep, sotqa jiberdi.

Almaty prokýratýrasynan málim etkendeı, kompanııa basshylyǵy turǵyn úı keshenderiniń qurylysyna ruqsat qujattarynsyz jáne úleskerlerdiń qarajatyn tartý quqyǵynsyz 2022-2023 jyldar aralyǵynda úsh turǵyn úı keshenindegi páterlerdi satý syltaýymen azamattardyń aqshasyn aldaý jolymen jymqyrǵany anyqtaldy.

Atalǵan is boıynsha 312 adam jábirlenýshi dep tanylyp, jalpy shyǵyn 2,5 mlrd teńgeden asqan.

Jaýapkershiligi shekteýli seriktestiktiń tórt basshysy ustalyp, qazirgi tańda qamaýda otyr.

– Tergep-tekserý aıasynda jábirlenýshilerdiń quqyqtaryn qalpyna keltirý qamtamasyz etildi, al qylmystyq is máni boıynsha qaraý úshin sotqa joldandy, – delingen habarlamada.

Almaty qalasynyń prokýratýrasy azamattarǵa qurylys kompanııalarymen kelisimshartqa otyrmas buryn muqııat tekserip, tek resmı qujattar negizinde ǵana qarajat salý qajettigin eskertedi.

Osyǵan deıin Almaty ákimi «Úsh qońyr» jáne «Vesnovka» turǵyn úı keshenindegi daýly páterlerge qatysty pikir bildirip, onda páterler satýǵa tyıym salynǵanyn aıtqan bolatyn.