Almatyda qurylys qaldyqtaryn tasymaldaýǵa qatysty baqylaý kúsheıtildi
ASTANA. KAZINFORM — «Taza Qazaqstan» respýblıkalyq aktsııasy men «Zań jáne tártip» qaǵıdatyn iske asyrý aıasynda Almaty qalasynda júk tasymaldaý talaptarynyń saqtalýyn baqylaýǵa baǵyttalǵan reıdtik is-sharalar turaqty ári júıeli túrde júrgizilip jatyr.
Baqylaý barysynda abattandyrý qaǵıdalaryn buza otyryp júk tasymaldaıtyn júk kólikterine erekshe nazar aýdarylady. Atap aıtqanda, tentsiz qozǵalý, júktiń tıisti túrde bekitilmeýi, sondaı-aq joldyń júrý bóligine topyraq, qurylys qaldyqtary men sýsymaly materıaldardyń tógilýine jol berý faktileri anyqtalǵan.
Mundaı quqyqbuzýshylyqtar qaladaǵy sanıtarlyq jaǵdaıǵa keri áser etip qana qoımaı, jol qozǵalysy qaýipsizdigine de eleýli qater tóndiredi.
Jyl basynan beri qala aýmaǵynda abattandyrý qaǵıdalaryn buzýdyń 819 deregi anyqtalyp, joly kesildi.
Reıdtik is-sharalar megapolıstiń barlyq aýdanynda turaqty negizde ótkizilip keledi jáne aldaǵy ýaqytta da jalǵasady.
— Biz júk kólikteriniń tentsiz nemese júk tasymaldaý talaptaryn buza otyryp qozǵalý faktilerin jıi tirkeımiz. Mundaı áreketter jol jabynynyń lastanýyna ákeledi. Buǵan jol berýge bolmaıdy. «Taza Qazaqstan» aktsııasy men «Zań jáne tártip» qaǵıdaty aıasynda reıdtik jumystar turaqty túrde júrgizilip jatyr. Bizdiń maqsatymyz — quqyq buzýshylyqtardy anyqtap qana qoımaı, jol qozǵalysyna qatysýshylardyń boıynda qalanyń tazalyǵyna jaýapkershilikpen qaraý mádenıetin qalyptastyrý jáne belgilengen talaptardy saqtaý qajettigin túsindirý, — dedi Almaty qalasy PD qoǵamdyq qaýipsizdik basqarmasynyń bastyǵy Tımýr Noǵaıbaev.
Budan buryn Almatyda kólik bes jaıaý júrginshini qaǵyp ketkenin jazǵanbyz.
