Almatyda qurylys dúkeninen shyqqan órt turǵyn úıdi sharpydy
Almatyda jeke úıdiń aýlasynda ornalasqan qurylys dúkeni otqa orandy, dep habarlaıdy QazAqparat tilshisi.
Qalalyq Tótenshe jaǵdaılar deparatamentiniń málimetinshe, 25 qyrkúıek, túngi saǵat 02:29 kezinde «101» pýltine Almaly aýdany, Brýsılovskıı kóshesi, 118 mekenjaıynda órt shyqqany týraly habar túsken.
«Alǵashqy órt sóndirý bólimsheleri kelgen kezde jeke turǵyn úıdiń aýlasynda ornalasqan qurylys dúkeni órtenip, jalyn úıdiń shatyryna taralyp úlgergen. Qyzyl jalyn 290 sharshy metr aýmaqty sharpydy», – dep málim etti departamentten.
Jalyn saǵat 03:04-te oqshaýlanyp, 03:51-de tolyǵymen joıyldy.
«Órt sóndirýshiler ońtústik jáne soltústik jaǵynda ornalasqan eki jeke turǵyn úıdi ottan qorǵap qaldy», – dedi TJD baspasóz qyzmetinen.
Vedomstvodan atap ótkendeı, tilsiz jaýmen kúres kezinde órt sóndirý bóliminiń qaraýyl bastyǵy qolynan jaraqat alǵan. Qazirgi ýaqytta onyń ómiri men densaýlyǵyna qaýip joq.
