Almatyda qurǵaq túıe sútin jasaǵan kontrafaktilik óndiris orny anyqtaldy

ALMATY. KAZINFORM — Almaty qalasy ádilet departamentiniń qyzmetkerleri «E» JShS-ne qatysty bótenniń taýar belgisin zańsyz paıdalaný faktileri boıynsha jospardan tys tekseris júrgizdi. 

Tekseris júrgizýge otandyq brendtiń resmı ótinishi negiz bolǵan. Іs-shara barysynda eleýli zań buzý anyqtalǵan: bóten taýar belgisin paıdalanyp jasalǵan 18 myńnan astam ónimi tabyldy.

— Bul iske erekshe mán beretin jaıt — tek saqtaý jáne satý maqsatyndaǵy ónim ǵana emes, sonymen qatar zańsyz óndiris faktisi de áshkerelendi. Arnaıy jabdyqta bótenniń taýar belgisin qoldanyp, qaptaý jáne tańbalaý jumystary júrgizilgeni anyqtaldy. Bul kontrafaktilik ónimdi óndirýdiń jolǵa qoıylǵan úderisi bar ekenin aıǵaqtaıdy, — dep habarlady ádilet departamentinen.

Barlyq anyqtalǵan taýarlar tárkilenip, tıisti hattamalar jasalǵan. Odan bólek materıaldar Qazaqstan Respýblıkasynyń Ákimshilik quqyq buzýshylyq týraly kodeksiniń 158-baby aıasynda is boıynsha odan ári qaraý úshin sotqa joldandy.

Eske salaıyq, buǵan deıin kontrafakt operatsııasy aıasynda 4 kúnde 272 adam ustalyp, 2 myń tyıym salynǵan ónim tárkilendi.