Almatyda kúresten ardagerler arasynda iri halyqaralyq jarys ótedi

ASTANA. KAZINFORM — 17-18 mamyr kúnderi Almatydaǵy Sadu Arena sport kesheninde erkin jáne grek-rım kúresinen ardagerler arasyndaǵy halyqaralyq týrnır ótedi.

QR Kúres federatsııasynyń habarlaýynsha, «Ardager alańy» dodasy osymen úshinshi ret uıymdastyrylyp jatyr. Oǵan AQSh, Reseı, Ózbekstan, Qyrǵyzstan jáne Qazaqstannyń barlyq aımaǵynan kelgen 500-ge jýyq balýan baq synaıdy.

Jarystyń júlde qory — 12 mln teńge. Týrnırdi Almaty qalalyq kúres federatsııasy men «Qazaqstan grek-rım jáne erkin kúres sheberleriniń qory» birrlesip ótkizýde.

Týrnır ıdeıasynyń avtory Erlan Malaevtyń aıtýynsha, bul jarysty ótkizýdegi basty maqsat — salaýatty ómir saltyn nasıhattap, ardagerler sportynyń deńgeıin kóterý.

«Sport eshkimge de artyq bolmaıdy. Bul jarysty ótkizgendegi negizgi ıdeıamyz — ardager sportshylardyń tasada qalmaı, jas urpaqqa úlgi bolar is-áreketimen tanylýy. Biz keıingi urpaqty adal isimizben, durys is-áreketimizben ǵana qyzyqtyra alamyz. Marqum ákemniń aıtqan sózderi áli esimde. «Balańdy durys tárbıeleımin deseń, oǵan kóp sóıleı bermeı, isińmen úlgi bol», — deıtin. Sol sekildi, ardager sportshylar áleýetin kórsetip, jas kelse de, kilemnen ketpeı, úlgi bop júrse, ǵanıbet emes pe?!», — deıdi jarysty uıymdastyrýshy Erlan Malaev.

Týrnırge Almaty qalasynan eki komanda qatysady, ıaǵnı, bir ǵana ońtústik astanadan 150 balýan baq synaıdy. Sondaı-aq, Qazaqstan quramasy sapynda ardagerler arasyndaǵy tórt dúrkin álem chempıony Esentaı Qapar da synǵa túsedi.

Aıta keterligi, Buǵan deıin eki ret uıymdastyrylǵan halyqaralyq týrnırge jalpy esebi 400-ge jýyq balýan qatysqan. Bul týrnır ardager sportshylar arasyndaǵy sanaýly jarystardyń biri bolmaq.

Osyǵan deıin habarlaǵanymyzdaı, Qyzylorda qalasynda Keńes Odaǵynyń Batyry Táıimbet Kómekbaevty eske alýǵa arnalǵan grek-rım kúresinen halyqaralyq týrnır ótken bolatyn.