Almatyda kýrerler jol erejesin jıi buzady — polıtsııa
ASTANA. KAZINFORM — Almaty qalasynda polıtsııa jetkizý qyzmetinde jumys isteıtin kýrerlerdiń jol qozǵalysy qaǵıdalaryn júıeli túrde óreskel buzý faktilerin jarııalady. Beınebaqylaý kameralary men patrýldik polıtsııa ekıpajdarynyń tirkeý qurylǵylaryna jazylǵan kadrlarda olardyń jol qaýipsizdigi talaptaryn jıi elemeıtini anyq kórinedi. Bul týraly Polisia.kz jazdy.
Atap aıtqanda kýrerlerdiń tyıym salynǵan baǵdarsham sıgnalyna ótýi, qarsy baǵyttaǵy jolaqqa shyǵýy, jaıaý júrginshiler ótkelderinen ótpeýi, trotýarmen qozǵalyp, avarııalyq jaǵdaılar týyndatýy jáne jol-kólik oqıǵalaryna sebep bolýy sııaqty quqyq buzýshylyqtary tirkelgen.
Qalalyq polıtsııa departamentiniń málimetinshe, jetkizý qyzmetinde jumys isteıtin júrgizýshilerdiń bir bóligi agregatorlar arqyly tartylǵan shetel azamattary bolyp tabylady.
Sonymen qatar keıbir jaǵdaılarda kólik quraldaryn tirkeý, tıisti sanattaǵy júrgizýshi kýáliginiń bolýy jáne mindetti saqtandyrý rásimdeý talaptarynyń tolyq saqtalmaıtyny anyqtalǵan. Polıtsııa ókilderi tapsyrysty jyldam oryndaýǵa degen umtylys jol qozǵalysyna qatysýshylardyń ómiri men densaýlyǵyna qaýip tóndirýge sebep bolmaýy tıis ekenin atap ótti.
— Árbir mundaı quqyq buzýshylyq — yqtımal qaıǵyly jaǵdaıdyń alǵysharty. Biz asyǵystyq pen jol qozǵalysy qaǵıdalaryn elemeý saldarynan jaıaý júrginshilerge, balalarǵa jáne ózge de júrgizýshilerge naqty qaýip tóndiretin jaǵdaılardy tirkep otyrmyz. Qaladaǵy qaýipsizdik kommertsııalyq múddeniń qurbany bolmaýy tıis, — dedi Almaty qalasy PD profılaktıka jáne úılestirý jumysy basqarmasynyń bastyǵy Jandos Kavlıev.
Beınematerıaldardy jarııalaý jetkizý qyzmetteri salasyndaǵy baqylaýdy kúsheıtýge baǵyttalǵan keshendi sharalardyń bir bóligi bolyp tabylady. Buǵan deıin polıtsııa departamentinde iri agregatorlar, qadaǵalaý organdary jáne beıindi qyzmet ókilderiniń qatysýymen jumys keńesi ótkizilip, ishki baqylaýdy kúsheıtý, qyzmetkerlerdiń qujattaryn tekserý jáne jol qozǵalysy qaǵıdalaryn saqtaý talaptary naqtylanǵan.
Polıtsııa jetkizý qyzmetinde jumys isteý jol qozǵalysy qaǵıdalaryn buzǵany úshin jaýapkershilikten bosatpaıtynyn eskertedi. Anyqtalǵan barlyq quqyq buzýshylyqtarǵa quqyqtyq baǵa berilip, kináli tulǵalar zańnamaǵa sáıkes jaýapkershilikke tartylady. Polıtsııa atalǵan sanattaǵy jol qozǵalysyna qatysýshylarǵa qatysty baqylaý sharalary aldaǵy ýaqytta da jalǵasyp, kúsheıtiletinin málimdedi.
Eske sala keteıik, buǵan deıin elde kýrerlerge tumaýǵa qarsy vaktsınany tegin saldyrý máselesi pysyqtalyp jatqanyn jazǵan edik.