Almatyda qurbandyq shalatyn 12 oryn belgilendi

ALMATY. KAZINFORM – Megapolıste bıyl qurbandyq shalýǵa 12 oryn belgilendi. Bul týraly brıfıng barysynda Almaty qalasynyń bas ımamy Ospan Tólebı aıtty.

– Bıyl qasıetti Qurban aıt meıramyn musylmandar 6, 7 jáne 8 maýsym kúnderi atap ótedi. Almatynyń alty aýdanynda osyǵan oraı úlken meshitterge jaqyn jerde qurban shalatyn 12 arnaýly oryn ashyldy,– dedi spıker.

Atap aıtar bolsaq, Alataý aýdany boıynsha – Myrzahmet meshiti, Ásker ata meshiti, Alǵabas meshiti;

– Bostandyq aýdany boıynsha – Baqytkeldi meshiti;

– Medeý aýdany boıynsha – Omar ıbn ál-Hattab meshiti, Amanqul ata meshiti, Fatıma meshiti, Raıymbek batyr jáne Arafat meshiti;

– Naýryzbaı batyr aýdany boıynsha – Qalqaman-2 meshiti;

– Túriksib aýdany boıynsha – Qaırat meshiti;

– Jetisý aýdany boıynsha – Ál-Mádına meshiti.

6 maýsym kúni tańǵy saǵat 06:00-de qalanyń 56 meshitinde Aıt namazy oqylady.

– Namazdan keıin birden qurbandyq shalý rásimi bastalady. Qurban aıt - bul jaı ǵana rásim emes, bul - janashyrlyq pen saýapty is. Bul kúnderi muqtaj jandarǵa qol ushyn sozyp, baýyrmal bolyp, izgilikke umtylǵan durys,– dedi Almaty qalasynyń bas ımamy Tólebı Ospan.

Onyń aıtýynsha, jyldaǵydaı arnaýly oryndarda mal satylyp, qurbandyq shalynyp, et taratylady. Barlyq oryn taza, sharıǵat normalaryna saı keledi. Dinı rásimdi meshittiń qyzmetkerleri baqylaıtyn bolady.

Dinı sharalardan bólek, dástúrli merekelik baǵdarlama da josparlanǵan. Qurban aıt merekesine oraı barlyq meshitterde kıiz úıler tigilip, merekelik dastarhan jaıylady, ulttyq sport oıyndary uıymdastyrylady.

Aıta keteıik, Qurban Aıt - musylmandardyń eń mańyzdy merekeleriniń biri, ol Oraza aıaqtalǵannan keıin 70-kúni toılanady.

Osyǵan deıin Qazaqstan musylmandary dinı basqarmasy el óńirlerindegi Qurban aıt namazynyń kestesin jarııalaǵan bolatyn.