Almatyda quraq kórpe jınaýdan álemdik rekord ornatyldy
ALMATY. KAZINFORM — Almatyda jańa álemdik rekord ornatyldy.
Medeý muz aıdynynda erekshe mádenı is-shara ótti. Alaman quraq qaýymdastyǵynyń uıymdastyrýymen muzaıdyn alańyn tolyq qamtyǵan quraq kórpeler birge jınaldy. Elimizdiń túkpir-túkpirinen kelgen sheberler Medeýde bas qosty. Al olardyń jumysyn GBR dúnıejúzilik rekordtar kitabynyń ókilderi baǵalady.
Global Book of Records dúnıejúzilik rekordtar kitabynyń Azııa jáne Afrıka boıynsha bas ofıtseri Qýandyq Qudaıbergenov bul bastamanyń qalaı iske asqanyn atap ótti.
— Álemde áıgili 4 dúnıejúzilik rekordtar kitaby bar. Onyń ishinde Global Book of Records mádenı rekordtarǵa kóp kóńil bóledi. Bizdiń Mýmbaı men Dýbaıdaǵy ofısterimizge Qazaqstannyń Alaman quraq qaýymdastyǵynan etno-rekord tirkeýge usynys tústi. Bizdi qyzyqtyrǵany — Qazaqstannyń barlyq 20 óńirinen 660 quraqshy keldi. Ekinshiden, bizdiń kitap ıÝNESKO-nyń materıaldyq mádenıetti saqtaý baǵdarlamalaryn qoldaıdy. Sondyqtan bul bastamany qoldaıyq dep sheshtik. Sebebi qazaqtyń quraq kórpesiniń tarıhy 2,5 myń jylǵa ketedi, — dedi ol.
Sondaı-aq Qýandyq Qudaıbergenov Almatyda ornatylǵan rekordtyń ereksheligin atap ótti.
— Bul quraqtyń ereksheligi — rekord ornatýǵa usynys boıynsha quraq kórpelerdiń barlyǵy bir tústi, salmaǵy men ólshemi birdeı bir materıaldan jasaldy. Álemde birde bir kitapqa mundaı rekord tirkelmegen, — dedi ınspektor.
Onyń aıtýynsha, rekord tirkeý úshin jınalǵan quraqtardyń ólshemderin ózi jáne megapolıske arnaıy kelgen Chehııa men Frantsııanyń mamandar teksergen. Al qorytyndy sheshim Mýmbaı qalasyndaǵy negizgi keńsede qabyldandy.
Uıymdastyrýshylar málimetinshe, is-sharaǵa atsalysqan quraqshylardyń eń kishisi 6 jasta, eń úlkeni — 90 jasta. Odan bólek 660 adamnyń beseýi er adam, 24 bala jáne 17 jasópirim bar. Al óńirler boıynsha bastamaǵa qatysqan eń úlken delegatsııa Almaty qalasy (93) men Túrkistan oblysynan (99).
Alaman quraq jobasynyń negizin qalaýshy Nurgúl Abaıhannyń aıtýynsha, bul joba qatarynan úshinshi jyl ótip, jyl saıyn rekord jańartyp keledi.
— Birinshi jyly 200 quraqshy Qazaqstannyń rekordtar kitabyna endi. Byltyr 5 dúnıejúzilik kóshpendiler oıyndary aıasynda 450 quraqshy 450 kórpe tikti. Bıyl 660 quraqshy elimizdiń búkil aımaǵynan kep kórpe tósep jatyr. Bári birdeı úlgi men esebi jiberildi. Sony aldyn ala tigip ákeldi, qazir bir-birinine qosyp úlken kilem shyǵardyq. Jobanyń maqsaty — qazaqtyń quraq kórpesin álemge tanytý. Qazirgi tańda myńǵa jýyq adamnyń basyn qosyp otyr. Bul joba osymen toqtamaıdy. Qazaqtyń quraqshylary tek kórpe tigýmen shektelmeıdi, ulttyq salt-dástúrdi dáripteıdi, qazaqtyń quraǵyn brend retinde qalyptastyrýǵa kómektesedi, — dedi Nurgúl Abaıhan.
Al Jetisý oblysynan arnaıy kelgen 87 jastaǵy quraqshy Tumarbala Sálekeıeva tiginmen bala kezinen aınalysatynyn atap ótti. Ol qazaqy ónerdi óziniń balalaryna da úıretken. Keıýananyń qyzy da osy bastamaǵa qatysyp otyr.
— Búgin kórpe tigip ákeldim. Qolyń bilse, kókiregiń sara bolsa, qıyn emes. Qazaq quraqtaı quralsyn dep tileımin. Quraqtaı quralsaq, úlken bolamyz, keń bolamyz, — dedi el anasy.
Eske salaıyq, buǵan deıin Almatyda Qazaqstannyń eń uzyn laǵmany jasalyp, jańa rekord ornatyldy.