Almatyda qýraǵan alty myń aǵash kesiledi
ALMATY. KAZINFORM – Megapolıste 26 maýsym men 6 shilde aralyǵynda ótetin «Almaty Jazy» aktsııasy aıasynda sanıtarlyq maqsatta 6 myń aǵash kesiledi.
Qala ákimdiginen atap ótkendeı, apatty jaǵdaıdaǵy aǵashtardy sanıtarlyq maqsatta kesý qala turǵyndarynyń qaýipsizdigin qamtamasyz etedi.
Bul jumystar Almaty qalasy ákimdiginiń erekshe baqylaýynda.
«Aǵashtardy sanıtarlyq maqsatta kesýdiń ýaqytyly júrgizilmeýi adamǵa jáne múlikke zııan keltirýi múmkin. Osyǵan baılanysty aýrý jáne qýraǵan aǵashtardy sanıtarlyq maqsatta kesý, qatty jel men nóser kezinde butaqtardyń qulaý qaýpin azaıtady»,- dep habarlady ákimdikten.
Aktsııa barysynda qaýipti eńiste ósken aýrý jáne qýraǵan aǵashtardy kesý qarastyrylǵan. Onyń ornyna 10 ese kóp mólsherde kóshet otyrǵyzylady.
Bul naýqan adamdardyń qorshaǵan ortaǵa uqypty qaraýyn qalyptastyrýǵa, halyq arasynda joǵary azamattyq jaýapkershilikke tárbıeleýge, ekologııalyq mádenıetti arttyrýǵa arnalǵan.
Buǵan deıin «Almaty Jazy» aktsııasy bastalǵany týraly jazǵan edik.
Eske salaıyq, Prezıdent Taza Qazaqstan — kózboıaýshylyq jasaıtyn senbilik emes ekenin eskertken.
Keıin Memleket basshysy Qasym-Jomart Toqaev «Taza Qazaqstan» respýblıkalyq ekologııalyq aktsııasy aıasynda uıymdastyrylǵan jalpyqalalyq senbilikke qatysyp, elordadaǵy «Ulytaý» alleıasynda aǵash otyrǵyzǵan bolatyn.
