Almatyda kúnine 70 jup neke qııady

ALMATY. KAZINFORM — Jyl basynan beri Almaty qalasy boıynsha 4600-ge jýyq neke tirkelgen. Bul týraly «Azamattarǵa arnalǵan úkimet» memlekettik korporatsııasynyń Almaty fılıaly habarlady. 

Resmı málimetke sáıkes, megapolıste kúnine orta eseppen 70-ke jýyq neke qııý rásimi ótkiziledi. Neke qııýǵa ótinish bildirýshilerdiń ortasha jasy qyzdar arasynda — 29 jas, al jigitter arasynda — 32 jas.

Bir qyzyǵy, nekege turýǵa ótinish bergen azamattardyń ishindegi eń úlkeni — 92 jastaǵy er adam. Al eń jas jup zańda belgilengen talaptarǵa sáıkes ruqsat alyp, 16 jasynda otbasyn qurǵan.

Sondaı-aq jyl basynan beri shamamen 934 jup nekeni buzý týraly ótinish bergen. Ajyrasýǵa ótinish bildirýshilerdiń ortasha jasy er adamdar arasynda — 39 jas, áıel adamdar arasynda — 37 jas. Sondaı-aq osy kezeńde 409 jup shetel azamattarymen nekesin tirkegen.

— Almaty qalasynda neke tirkeý kórsetkishiniń joǵary bolýy — megapolıstiń demografııalyq belsendiliginiń aıǵaǵy. Biz azamattarǵa qolaıly ári ashyq qyzmet kórsetý úshin protsesterdi únemi jetildirip kelemiz. Ótinishti onlaın berý jáne saltanatty rásimdi aldyn ala brondaý azamattardyń ýaqytyn edáýir únemdeıdi, — dep habarlady memlekettik korporatsııasynyń Almaty fılıaly.

Eske salaıyq, neke qııýǵa ótinishti keminde 15 kún buryn tapsyrý qajet. Qyzmetti Azamattarǵa arnalǵan úkimet memlekettik korporatsııasy AHAT bólimsheleri, elektrondyq úkimet portaly nemese ekinshi deńgeıli bankterdiń mobıldi qosymshalary arqyly rásimdeýge bolady.

Buǵan deıin Qazaqstanda neke júziginiń baǵasy óskenin jazǵanbyz.