Almatyda quny 5 mln teńgege jýyq omyrtqaǵa jasalatyn operatsııalar tegin bolady
ASTANA. KAZINFORM - Quny 5 mln teńgege deıin jetýi múmkin omyrtqaǵa jasalatyn zamanaýı joǵary tehnologııalyq operatsııalar Almaty qalalyq ortalyq klınıkalyq aýrýhanasynda medıtsınalyq kórsetilimder bolǵan jaǵdaıda Mindetti áleýmettik medıtsınalyq saqtandyrý (MÁMS) jáne Tegin medıtsınalyq kómektiń kepildik berilgen kólemi (TMKKK) sheńberinde tegin júrgiziledi.
QR Densaýlyq saqtaý mınıstrligi baspasóz qyzmetiniń habarlaýynsha, aýrýhanada robot-assıstıvti tehnologııalar men neıronavıgatsııa júıesin qoldana otyryp, kúrdeli neırohırýrgııalyq operatsııalar jasalady.
Atap aıtqanda, omyrtqa ózegin dekompressııalaý jáne transpedıkýlıarlyq burandalardy ornatý operatsııalary júrgiziledi. Zamanaýı jabdyqtar operatsııa barysyn joǵary dáldikpen josparlaýǵa jáne ımplantattardy dál ornalastyrýǵa múmkindik berip, hırýrgııalyq aralasýdyń qaýipsizdigin arttyrady.
Osyndaı operatsııalardy oryndaıtyn mamandardyń biri – Almaty qalalyq ortalyq klınıkalyq aýrýhanasynyń neırohırýrgi Marat Serikuly Almatov. Ol 20 jyldan astam ýaqyt boıy nerv júıesiniń aýyr aýrýlary bar patsıentterdi emdeýmen aınalysyp keledi. Osy ýaqyt aralyǵynda dáriger myńnan astam patsıentke operatsııa jasaǵan.
Zamanaýı tehnologııalardyń artynda, eń aldymen, neırohırýrgtiń kásibı eńbegi tur. Neırohırýrgııada árbir qımyldyń asqan dáldigi, dárigerdiń kóp jylǵy tájirıbesi men joǵary zeıini asa mańyzdy.
Marat Almatov omyrtqa aýrýlary, epılepsııa, skolıoz, ınsýlt pen bas-mı jaraqattarynyń saldary kezinde kúrdeli operatsııalar jasaıdy. Sondaı-aq mı qan tamyrlary aýrýlary, sozylmaly aýyrsyný sındromdary jáne qozǵalys buzylystary bar patsıentterge medıtsınalyq kómek kórsetedi.
- Osylaısha, zamanaýı robot-assıstıvti tehnologııalar kúrdeli operatsııalardy joǵary dáldikpen júrgizýge múmkindik beredi. Al medıtsınalyq kórsetilimderi bar patsıentter mundaı medıtsınalyq kómekti MÁMS jáne TMKKK sheńberinde qosymsha aqy tólemeı ala alady,-delingen habarlamada.
Osyǵan deıin onlaın medıtsınalyq qyzmetterdiń aýqymy keńeıetini týraly jazdyq.
