Almatyda quny 2,6 mlrd teńge bolatyn Baspalar úıi memleket menshigine qaıtaryldy

ASTANA. KAZINFORM – Almatydaǵy Almaly aýdanynyń prokýratýrasy «Baspalar úıi» AQ aktsııalarynyń 100 paıyzyn memleket menshigine qaıtarýdy qamtamasyz etti.

Vedomstvonyń málimetinshe, 2016 jyly buryn QR Mádenıet jáne sport mınıstrligine tıesili, quny 2,6 mlrd teńge bolatyn aktsııalar jeke tulǵaǵa zańsyz jáne arzandatylǵan baǵamen jekeshelendirilgen.

«Memlekettiń múliktik múddelerin qorǵaý maqsatynda prokýratýra mámileni jaramsyz dep taný týraly sotqa talap-aryz berdi», – delingen prokýratýra habarlamasynda.

Apellıatsııalyq satynyń qaýlysymen birinshi satydaǵy sottyń prokýratýranyń talaptaryn qanaǵattandyrý týraly sheshimi ózgerissiz qaldyrylyp, zańdy kúshine endi.

Aıta keteıik, Almatyda kópfýnktsııaly sport ortalyǵy salynyp jatyr.