Almatyda quny 1 mlrd teńgeden asatyn 180 myń veıp tárkilendi

ALMATY. KAZINFORM - Almatyda elektrondy temekilerge tolyq tyıym salynǵanyna qaramastan, veıpterdiń zańsyz saýdasynyń iri shemasy áshkerelendi, dep habarlaıdy Almaty qalalyq prokýratýrasynyń baspasóz qyzmeti.

Baspasóz málimetterine qaraǵanda, tyıym kúshine engennen beri qalada veıpterdiń zańsyz aınalymynyń ondaǵan deregi anyqtaldy.

Negizgi satý arnasy – Telegram messendjeri men áleýmettik jeliler. Saýda jasyryn túrde júrgizilip, ónimder qoımalarda jáne jasyryn oryndarda saqtalǵan.

Almaty qalasy prokýratýrasynyń úılestirýimen Ekonomıkalyq tergep-tekserý departamenti kezekti qylmystyq isti aıaqtady.

Kúdiktiler tyıym salynǵan ónimdi «ESCOBAR OPTOM», «Snake opt» jáne basqa da Telegram-arnalar arqyly satqan.

Tergeý barysynda 180 myńnan astam veıp tárkilenip, joıyldy. Olardy satýdan túsýi múmkin tabys 1 mıllıard teńgeden asýy yqtımal bolǵan.

Qoımalar men satý núkteleri anyqtaldy. Kúdiktilerdiń múlkine 347 mıllıon teńge kóleminde shekteý salyndy.

Qylmystyq is sotqa joldandy, jaýapqa alty adam tartylyp otyr.

- Prokýratýra 2024 jylǵy maýsymnan bastap Qazaqstanda elektrondy temekilerdi, olarǵa arnalǵan hosh ıistendirgishter men suıyqtyqtardy ákelýge, óndirýge, satýǵa jáne taratýǵa tyıym salynǵanyn eske salady. Zańsyz aınalym úshin bas bostandyǵynan aıyrýǵa deıin qylmystyq jaýapkershilik qarastyrylǵan, - delingen habarlamada.

Osyǵan deıin Almatyda shamamen 2 mlrd teńgeniń veıpi tárkilengen bolatyn.