Almatyda kúndiz júk kólikteriniń qalaǵa kirýine shekteý qoıylady
ALMATY. KAZINFORM – Almatyda júk kólikterine arnalǵan jańa jol belgileri ornatylyp jatyr.
Almatyda bilikke túsetin júktemesi 8 tonnadan asatyn júk kólikteriniń qozǵalysyn shekteıtin jol belgilerin ornatý jumystary bastaldy. Shekteý kún saıyn saǵat 07:00-den 22:00-ge deıin Saın kóshesi – ál-Farabı dańǵyly – Shyǵys aınalma avtomobıl joly (ShAAJ) – Rysqulov dańǵyly aralyǵyndaǵy aýmaqta qoldanylady.
Jol qozǵalysyn uıymdastyrý jáne jolaýshylar kóligi basqarmasynyń málimetinshe, jol belgilerin ornatý jumystary 24 shildege deıin aıaqtalady dep josparlanyp otyr. Al 25 shildeden bastap barlyq uıymdastyrý sharasy aıaqtalǵan soń, júk kólikteriniń qozǵalysyna qatysty jańa shekteýler kúshine enedi.
Joba Almaty qalasy Polıtsııa departamentiniń Ákimshilik polıtsııa basqarmasymen birlesip iske asyrylyp jatyr.
- Jańa tártip qaladaǵy jol qozǵalysyn jeńildetýge, qozǵalysy eń qarqyndy magıstraldardaǵy júktemeni azaıtýǵa, jol qaýipsizdigin kúsheıtýge jáne ekologııalyq jaǵdaıdy jaqsartýǵa baǵyttalǵan. Osyǵan baılanysty júk kólikteriniń júrgizýshilerine qozǵalys baǵytyn aldyn ala josparlap, jańa jol belgileriniń talaptaryn jáne polıtsııa qyzmetkerleriniń nusqaýyn oryndaýǵa keńes beriledi, - dep habarlady ákimdikten.
Eske salaıyq, buǵan deıin Almatyda jańa ekologııalyq talaptar kúshine enýine baılanysty 2027 jyly qandaı shekteýler bolatynyn jazǵanbyz.
