Almatyda kún saıyn 90 otbasy shańyraq kóteredi

ALMATY. KAZINFORM – Osy jyldyń 11 aıynda Almaty qalasynda 17 500-den astam neke tirkeldi. 

«Azamattarǵa arnalǵan úkimet» memlekettik korporatsııasynyń Almaty qalasynyń fılıalynyń málimetinshe, megapolıste kúnine orta eseppen 90 neke qıylady. Shańyraq kóterýge nıet bildirgen qyzdardyń ortasha jasy – 28 bolsa, jigitter úshin – 31 jas.

Sonymen qatar bıyl nekege turýǵa ótinish bergenderdiń ishindegi eń eresekteri 80-85 jas aralyǵyndaǵy azamattar bolǵan. Al eń jas jup – zańda kórsetilgen talaptarǵa saı ruqsat ala otyryp, 16 jasta shańyraq kótergen. 

Odan bólek jyl basynan beri shamamen 3 000 jup nekeni buzý týraly ótinish bergen. 

– Almaty qalasynda neke tirkeý kórsetkishiniń joǵary bolýy – megapolıstiń demografııalyq belsendiliginiń aıǵaǵy. Biz azamattarǵa barynsha qolaıly jáne ashyq qyzmet kórsetý úshin protsesterdi jeńildetýdemiz. Ótinishti onlaın berý jáne saltanatty rásimdi aldyn ala brondaý ýaqyty edáýir únemdeıdi, - dep habarlady korporatsııanyń Almaty fılıaly.

Eske salaıyq, neke qııý úshin ótinishti 15 kún buryn tapsyrý qajet. Bul qyzmetti «Azamattarǵa arnalǵan úkimet» arqyly, elektrondyq úkimet portaly nemese ekinshi deńgeıli bankterdiń mobıldi qosymshalary arqyly rásimdeýge bolady. 

Buǵan deıin Qazaqstanda neke jasy ulǵaıyp, azamattyq neke kóbeıip kele jatqanyn jazǵanbyz.