Almatyda kún saıyn 300-deı bala jaraqat alady
ALMATY. KAZINFORM — Jazǵy demalys bastalǵaly beri Almatyda jaraqat alǵan balalardyń sany jyldaǵydaı artyp barady. Sonyń ishinde eń kóp kezdesetini — átkenshekte, beltemir men sport alańynda alǵan jaraqat pen velosıped, samokat pen rolıkti konkı teýip júrip jaraqat alǵandary.
Balalarǵa shuǵyl medıtsınalyq kómek kórsetý ortalyǵynyń travmatolog-ortopedi Baqyt Qojahanovtyń aıtýynsha, jaz mezgilinde Balalarǵa shuǵyl medıtsınalyq kómek kórsetý ortalyǵynyń travmpýnktine kún saıyn ártúrli jaraqat alǵan 300-deı bala kómek surap keledi eken.
— Velosıped, samokat teýip, beltemir men oıyn alańynda júrip alǵan kóshedegi jaraqat birinshi orynda tur. Balalar fýtbol oınaıdy, qulap, qol-aıaǵyn syndyryp, shyǵaryp alady. Tipti jaı ǵana júgirip kele jatyp qulaǵannyń ózinen de aýyr jaraqat alýy múmkin, — deıdi Baqyt Qojahanov Óńirlik kommýnıkatsııalar qyzmetinde ótken brıfıngte.
Jyl saıyn travmatologııalyq pýnkt 32 myńnan astam naýqasty qaraıdy. Balalarǵa shuǵyl medıtsınalyq kómek kórsetý ortalyǵyna jalpy 53 myńnan astam bala medıtsınalyq kómekke júginedi. Shamamen 3 myń bala jyl saıyn statsıonarda em alady.
Dárigerdiń aıtýynsha, qaladaǵy halyq sany ósip bara jatqandyqtan, balalar jaraqaty da jyl saıyn 5-10% artyp barady eken.
Mamandardy jylda trezeden qulap jatqan balalar da alańdatyp otyr. Jyl saıyn Almatyda dál osyndaı 7-10 oqıǵa tirkeletin kórinedi.
Terezesi ashyq bólmege, qorǵanysh quraly joq úıge qaraýsyz tastap ketetindikten, kóbinese 3-5 jas aralyǵyndaǵy balalar kóp zardap shegedi.
— Ata-anasynyń qaýipti eskermeýi osyndaı oqys oqıǵaǵa túrtki bolyp jatady. Kishkentaı balalardy qaraýsyz qaldyrýǵa múldem bolmaıdy. Terezege qorǵanysh qurylǵylar ornatý qajet, — deıdi Baqyt Qojahanov.
Onyń aıtýynsha, Almatyda aýyr jaraqat alǵan balalarǵa táýlik boıy eki mamandandyrylǵan balalar aýrýhanasy medıtsınalyq kómek kórsetedi. Bıyl terezeden qulaǵan balalar ázirge tirkele qoımapty.
Maman sondaı-aq ata-analarǵa jedel járdem kelgenge deıin alǵashqy kómek kórsetý erejelerin eske saldy. Bala qulaǵan jaǵdaıda onyń jaǵdaıyn baǵalap, qan ketse toqtatýǵa tyrysyp, dereý dáriger shaqyrý qajet.
— Jedel járdem kelgenge deıin balaǵa sý, tamaq nemese aýyrsynýdy basatyn dári berýge bolmaıdy. Bul shuǵyl medıtsınalyq kómekti qıyndatyp, qajetti protsedýralarǵa daıyndyq ýaqytyn uzartady, — dep túsindirdi dáriger.
Baqyt Qojahanovtyń aıtýynsha, eń kóp jaraqat alatyndar 5 pen 15 jas aralyǵyndaǵylar, balalar osy kezde óte belsendi bolǵandyqtan, kóbine kóshede oınap júrip kóp jaraqat alady eken.
Eske salaıyq, buǵan deıin Almatyda jyl basynan beri tórt bala terezeden qulap ketkenin jazǵan edik.
