Almatyda kún raıy kúrt buzylady

ALMATY. KAZINFORM – Almatynyń tótenshe jaǵdaılar departamenti erteń, 17 sáýirde qalada aýa raıynyń kúrt nasharlaıtynyn habarlady.

Sınoptıkterdiń málimetinshe, megapolıste keı ýaqyttarda nóser jańbyr jaýyp, naızaǵaı oınaıdy, kúndiz burshaq túsýi múmkin. Soltústik-batys jeliniń ekpini sekýndyna 15-20 metrge deıin jetedi.

– Іle Alataýynyń taýly aımaqtarynda, sonyń ishinde Medeý jáne Bostandyq aýdandarynda jaýyn-shashyn (jańbyr men qar) mol túsip, naızaǵaı oınaıdy. Kúndiz burshaq jaýyp, jel kúsheıedi. Jeldiń baǵyty ońtústik-batystan soltústik-batysqa aýysyp, ekpini 17-22 m/s, al túnde keı jerlerde 23-28 m/s-ke deıin jetýi múmkin, - delingen habarlamada.

Mamandar qolaısyz aýa raıyna baılanysty taýǵa barýdy keıinge qaldyrýdy eskertti. Qala turǵyndary kólikterin aǵashtardyń astyna qaldyrmaǵany jón. Sonymen qatar ekpini kúshti jel kezinde múmkindiginshe ǵımarattan shyqpaı, tereze men esikterdi myqtap jabý qajet.

Sondaı-aq vedomstvo ókilderi aýladan, balkondar men lodjııalardan ushyp ketýi múmkin zattardy alyp tastaýdy, kóshede júrgende qaýipsiz oryndarǵa panalaýdy eskertti. Mamandar bılbordtar men aǵashtardyń, elektr jelileriniń astynda, aıaqtalmaǵan qurylystar mańynda turmaýǵa keńes berdi.

Eske salaıyq, buǵan deıin Almatynyń kommýnaldyq qyzmeti nóser jańbyrǵa baılanysty kúsheıtilgen rejımge kóshkenin jazǵanbyz.