Almatyda «Quqyqtyq dárihana» jobasy jalǵasatyn boldy

ALMATY. KAZINFORM - 2025 jyldyń 11 maýsymy men 11 shildesi aralyǵynda Almaty qalasynyń prokýratýrasy «Quqyqtyq dárihana» pılottyq jobasyn iske asyrdy.

Bas prokýratýra málimetinshe, jobanyń aıasynda quqyqtyq keńes berý qyzmetteri qalanyń úsh iri saýda ortalyǵynda– «Dostyq Plaza», «Mega Almaty» jáne «Grand Park» nysandarynda kórsetildi. Azamattarǵa kúndelikti ómirde týyndaıtyn túrli máseleler boıynsha quqyqtyq keńes berildi: qujattardy resimdeý, áleýmettik tólemder, otbasylyq jáne turǵyn úı máseleleri, tutynýshy quqyqtaryn qorǵaý jáne basqa da baǵyttar qamtyldy.

Jobanyń joǵary suranysqa ıe bolǵanyn jáne kelýshiler sanynyń kóptigin eskere otyryp, ony jalǵastyrý týraly sheshim qabyldandy.

2025 jyldyń 25 shildesiden 1 qarashasyna deıin «Quqyqtyq dárihana» jobasy «Dostyq Plaza» saýda ortalyǵynyń bazasynda jalǵasady.

Azamattardy qabyldaý ár aptanyń juma kúni saǵat 17:00-den 20:00-ge deıin júrgiziledi.

Jobanyń maqsaty – halyqtyń quqyqtyq kómekke qoljetimdiligin arttyrý, prokýratýra organdarynyń ashyqtyǵyn qamtamasyz etý jáne azamattarmen tıimdi keri baılanysty ornatý.

Eske salsaq, Memleket basshysy Qasym-Jomart Toqaev quqyq qorǵaý organdarynyń keńeıtilgen alqa májilisinde ádiletti ári qaýipsiz Qazaqstandy qurý úshin zań men tártip ústemdigin túbegeıli ornyqtyrý kerek ekenin aıtty.