Almatyda kúdiktilerdi azaptady dep aıyptalǵan eki polıtseı sottaldy
ASTANA. KAZINFORM — Almaty qalasynyń Qylmystyq ister jónindegi mamandandyrylǵan aýdanaralyq soty azaptaýdy qoldanǵan eki polıtsııa qyzmetkerine qatysty aıyptaý úkimin shyǵardy.
Qylmystyq isti Almaty qalasynyń arnaıy prokýrory tergep-tekserdi.
— 2023 jyly 29 naýryzda kináli polıtsııa qyzmetkerleriniń týysynyń páterine jetkizilgen azamatqa qatysty oǵan bótenniń múlkin urlaǵanyn moıyndatý maqsatynda azaptaýlar qoldanylǵany dáleldendi. Polıtsııanyń zańǵa qaıshy áreketteriniń saldarynan jábirlenýshige tán azaby keltirilgen. Kináni moıyndaý týraly protsestik kelisimin eskere otyryp, sot úkimimen sottalýshylarǵa 3 jyl 6 aı merzimge shartty túrde bas bostandyǵynan aıyrý jazasy taǵaıyndalyp, probatsııalyq baqylaý belgilendi. Sottalǵandar arnaýly ataqtarynan jáne memlekettik qyzmette jumys isteý quqyǵynan aıyryldy. Úkim zańdy kúshine endi, — delingen vedomstvo habarlamasynda.
Prokýratýranyń usynýy boıynsha qaramaǵyndaǵylardyń qyzmetine baqylaýdyń joqtyǵy jáne qyzmettik mindetterin tıisinshe oryndamaǵany úshin 10 polıtsııa qyzmetkeri, onyń ishinde 5 qurylymdyq bólimshe basshysy tártiptik jaýaptylyqqa tartyldy.
Buǵan deıin habarlanǵandaı, Pavlodarda prokýrorlar taǵy da qart adamdardy azaptaý faktilerin anyqtady.