Almatyda Krisha saıtyna zańsyz jarnama úshin aıyppul salyndy
ALMATY. KAZINFORM – Platforma úlestik qurylysqa adamdardyń qarajatyn tartýǵa ruqsaty joq turǵyn úıler jarnamasyn ornalastyrǵan. Bul týraly Almatynyń qala qurylysyn baqylaý basqarmasy habarlady.
Basqarma málimetinshe, júrgizilgen jumystardyń nátıjesinde Krisha.kz jáne Korter.kz ınternet-platformalarynyń operatorlaryna Qazaqstan Respýblıkasynyń «Turǵyn úı qurylysyna úlestik qatysý týraly» Zańy talaptaryn buza otyryp, qurylys nysandarynyń jarnamasyn ornalastyrǵany úshin ákimshilik quqyq buzýshylyq týraly hattamalar toltyryldy.
- Qoldanystaǵy zańnamaǵa sáıkes kóppáterli turǵyn úılerdiń qurylysyna azamattardyń qarajatyn tartýǵa, sondaı-aq osyndaı nysandardy jarnamalaýǵa ýákiletti organnyń tıisti ruqsaty nemese úleskerlerdiń quqyǵyn qorǵaýdyń zańda kózdelgen ózge de tetikteri bolǵan jaǵdaıda ǵana jol beriledi. Atalǵan ınternet-alańdarda jarnamalanǵan nysandarda mundaı ruqsat qujattary bolmaǵan, - dep habarlady vedomstvo.
Nátıjesinde «Kolesa» AQ-na (Krisha.kz) – 1000 AEK (4 mln teńge), al «Fletfaı-Qazaqstan» fılıalyna (Korter.kz) – 500 AEK (2 mln teńge) kóleminde aıyppul taǵaıyndaldy.
Basqarma baspana satyp almas buryn qurylys kompanııasynan úleskerlerdiń qarajatyn tartýǵa berilgen ruqsattyń jáne basqa da qujattardyń bar-joǵyn tekserýdi usyndy.
Salynyp jatqan nysandarǵa qatysty ruqsat qujattary týraly aqparat alý úshin turǵyndar qala qurylysyn baqylaý basqarmasynyń +7 (705) 89 66 000 nómiri boıynsha anyqtamalyq WhatsApp-arnasyna júgine alady.
Eske salaıyq, buǵan deıin Almatyda 214 qurylys kompanııasynyń lıtsenzııasy ýaqytsha toqtatyldy.
