Almatyda kran-balkany paıdalanýǵa shekteý qoıyldy
ASTANA. KAZINFORM — Almaty qalasy Tótenshe jaǵdaılar departamentiniń Ónerkásiptik qaýipsizdik basqarmasy memlekettik baqylaý men qadaǵalaý aıasynda júk kótergish kran-balka jabdyǵynyń tehnıkalyq talaptarǵa sáıkestigin jan-jaqty tekserdi.
Inspektsııa barysynda atalǵan qurylǵyny qanaǵattanarlyqsyz kúıde paıdalaný saldarynan zańnamalyq normalardyń eleýli aýytqýlary aıqyndaldy.
— Mundaı kemshilikter qyzmetkerlerdiń ómiri men densaýlyǵyna tikeleı qater tóndirip, óndiristik apattar men qaıǵyly jaǵdaılarǵa soqtyrýy yqtımal. Osyǵan oraı, qoldanystaǵy zańnama sheńberinde atalǵan tehnıkany paıdalaný toqsanaýly kún merzimge ýaqytsha toqtatyldy. Óndiristik nysandarda belgilengen erejelerdi qatań ustaný — qaıǵyly oqıǵalardyń aldyn alýdyń jáne eńbek ujymyna qaýipsiz jumys ortasyn qalyptastyrýdy qamtamasyz etetin basty negiz, — delingen basqarma habarlamasynda.
Osyǵan baılanysty ýákiletti basqarma tarapynan uıym basshylaryna júk kótergish mehanızmderdiń tehnıkalyq jaı-kúıine udaıy monıtorıng júrgizý qajettigi eskertiledi.
Buǵan qosa, jabdyqtardy merzimdi tehnıkalyq kýálandyrýdan ótkizý, anyqtalǵan kemshilikterdi der kezinde joıý jáne qurylǵylardy qozǵalysqa qosqanda barlyq saqtyq sharalaryn buljytpaı oryndaý qajettigi eskertiledi. Mundaı keshendi talaptardyń oryndalýy eńbek qaýipsizdigin tolyq qamtamasyz etýge múmkindik beredi.
Budan buryn Atyraýda qurylysta zańsyz jumys istegen 100 sheteldik anyqtalǵanyn jazǵanbyz.
