Almatyda qoıma órtenip jatyr

ASTANA. KAZINFORM –  TJM qutqarýshylary órtti sóndirip jatyr. 

Osy sátte Almaty qalasy órt sóndirýshileri Rysqulov dańǵylyndaǵy bazar aýmaǵynda qoımadaǵy órtti sóndirip jatyr.

Oqıǵa ornyna Almaty qalasy TJD bastyǵy Nurlan Atyǵaevtyń qatysýymen órtti sóndirýge arnalǵan shtab jumyldyryldy.

Almaty qalasynyń TJD habarlaýynsha, 16 aqpan kúni 20:11-de kúshter men quraldar joǵary dárejeli shaqyrtý boıynsha Alataý aýdany, Rysqulov dańǵyly, 103/2a mekenjaıyna jiberildi.

-  20:17-de oqıǵa ornyna jetkende qoıma ǵımaratynyń ashyq jalynmen janyp jatqany anyqtaldy. Órt sóndirý oqpandary iske qosylyp, avtotsısternalar órt gıdranttaryna qosyldy, sýmen úzdiksiz qamtamasyz etý uıymdastyryldy. Órt ornynda jedel shtab qurylyp, eki órt sóndirý ýchaskesi jasaqtaldy, sondaı-aq órt sóndirý avtosatysy ornalastyryldy, - dep habarlady qala TJD baspasóz qyzmeti.

TJM málimetinshe, oqıǵa ornynda 77 adam men 19 tehnıka jumys istep jatyr.

Eske salsaq búgin Ekibastuzda saýda úıiniń tóbesi opyrylyp túsip, saldarynan 5 adam zardap shekken edi.